Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 48 Hüküm no: 29 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze’deki Sultan Orhan Gazi Camii evkafından Kartal mukataasının Ayazade Süleyman Ağa’ya iltizam olunduğu Vech-i tahrîr-i hurûf budur ki Mukāta‘ât-ı Haremeyn’den Gekbûze’de vâki‘ merhûm ve mağfûrun-leh Sultân Orhan Gāzî -tâbe-serâhu- hazretlerinin binâ buyurdukları câmi‘-i şerîfi evkāfından olup Üsküdar muzâfâtından ber-mûceb-i şurût-ı hatt-ı hümâyûn cânib-i mîrîden mâlikâne kayd ve fürûht olunan Kartal ve tevâbi‘i mukāta‘ası bâ-berat-ı âlîşân ber-vech-i iştirâk mâlikâne kaydolunup es-Seyyid Ahmed Efendi ve es-Seyyid Mehmed Ağa işbu bin yüz yetmiş sekiz senesi Martı ibtidâsından sene-i mezbûr Şubat’ı gāyetine değin zabt u rabt eylemek üzere taraflarından tarafımıza üç bin beş yüz guruşa der-uhde ve iltizâm olunup ben dahi iltizâmı kabûl edüp biz dahi mukāta‘a-i mezbûrun nısfını tarafımızdan dârende-i temessük Ayazâde Süleyman Ağa’ya bin yüz elli guruşa iltizâm olunup ve bedel-i iltizâmından sene-i mezbûre mâlına mahsûb olmak üzere ber-vech-i peşîn bin guruşa tarafımıza teslîm olunup ahz ü kabz olunmağla gerekdir ki ağa-yı mûmâ-ileyhe mukāta‘a-i mezbûreden hâsıl olan â‘şâr-ı şer‘iye ve rüsûmât-ı örfiye ve cürm ü cinâyet ve bâd-ı hevâ ve beytülmal-ı âmme ve hâssa ve sâir hukūk ve rüsûmât ve tapu-yı zemîn, yava ve kaçgun ve kâffe-i mahsûlât ve rüsûmât ve âidâtı kadîmden olageldiği üzere ahz ü kabz ve şurût-ı serbestiyet üzere zabt u rabt eyleyüp vechen mine’l-vücûh ve sebeben mine’l-esbâb taraf-ı âhardan ve tarafımızdan bir ferd müdâhale ve mu‘âraza eylemeyeler. Tahrîren fi’t-târîhi’l-mezbûr sene 1178