.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 115
Hüküm no: 117
Orijinal metin no: [18a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ali b. el-Hâc Mustafa’nın vasisi Himmet Beşe’nin Kartal’daki bağı istiğlal yoluyla sattığı

Medîne-i Üsküdar kazâsına tâbi‘ Kartal nâm karye ahâlîsinden Mavridi v. Kirnazi nâm zimmî mahfil-i şer‘-i hatîr-i lâzımü’t-tevkīrde işbu sâhibü’l-kitâb Ali b. el-Hâc Mustafa nâm mümeyyizin kendüye umûri’çün kıbel-i şer‘-i mergūbdan vasiyy-i mansûbu olan Himmet Beşe b. Mehmed muvâcehesinde bi’t-tav‘i’s-sâf ikrâr u i‘tirâf edip karye-i mezbûre sınırı dâhilinde bir tarafdan Polohoroni nâm zimmî bağı ve bir tarafdan Fıçıcı Delisar nâm zimmî bağı ve bir tarafdan Palaloga nâm zimmî tarlası ve bir tarafdan tarîk-i âm ile mahdûd ve mümtâz olan bir kıt‘a mülk bağımı mezbûr Himmet Beşe’ye dört bin akçeye bey‘ edip ol dahi sagīr-i mezbûr malıyla bi-tarîkı’l-istiğlâl iştirâ ve tesellüm eyleyip semen-i mersûmu yedinden ahz ve istîfâ eyledikden sonra târîh-i kitâbdan bir sene tamamına değin zikr olunan bağı vasiyy-i mezbûrdan altı yüz akçeye istîcâr ve kabûl edip ol dahi vech-i muharrer üzere bana îcâr ve teslîm eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb sebt ü ketb olundu.

Fî-gurreti Zilka‘deti’l-harâm min-şühûri sene selâse ve sittin ve elf.

Şuhûdü’l-hâl: Mahmud Beşe b. Ömer, Hasan b. İsmail, Ahmed Beşe b. el-Hâc Hasan, Yusuf b. Hamza, Süleyman Beşe b. Yusuf ve gayruhum mine’l-huzzâr.