|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 114 Hüküm no: 116 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Asanine’nin bazı mallarını satarak kocasına borç olarak verdiği parayı talep ettiği
İşbu bâ‘isetü’l-kitâb Asanine bt. ( ) nâm Nasrâniye zevc-i mutallıkı Zakar v. Dimo nâm zimmîyi mahfil-i kazâda ihzâr ve üzerine da‘vâ edip târîh-i kitâbdan beş sene mukaddem ba‘zı celî emvâlimi bey‘ edip semenlerinden müctemi‘ olan on beş bin akçeyi mezbûr Zakar’a Yolgeçen odaları nâm mevzi‘de ikrâz ve teslîm edip ol dahi iktirâz ve tesellüm eylemiş idi. Hâlâ vermekde ta‘allül eder, suâl olunup alıverilmesi matlûbumdur dedikde, gıbbe’s-suâl ve akībe’l-inkâr müdde‘iye-i mezbûreden da‘vâsına mutâbık beyyine taleb olundukda takyeci tâifesinden Yani v. Miho ve diğer Yani v. Dimo nâm zimmîler li-ecli’ş-şehâde meclis-i şerî‘at-i şerîfede hâzırân olup istişhâd olunduklarında fi’l-vâki‘ müdde‘iye-i mezbûre Asanine meblağ-ı mezbûr on beş bin akçeyi târîh-i mezbûrda mevzi‘-i merkūmda merkūm Zakar’a bizim huzûrumuzda ikrâz ve teslîm edip ol dahi iktirâz ve tesellüm eyledi, biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr on beş bin akçeyi müdde‘iye-i mezbûreye teslîm etmek üzere merkūm Zakar’a tenbîh-birle mâ-vaka‘a bi’t-taleb ketb ü sebt olundu.
Fi’l-yevmi’r-râbi‘ min-Zilka‘deti’ş-şerîfe li-sene selâse ve sittin ve elf.
Şuhûdü’l-hâl: el-Hâc Hüseyin b. Abdullah, Ali Çelebi b. Mustafa, Hüseyin Beşe b. Abdullah, Hasan Çelebi b. Kanber er-ressâm, Mehmed Çelebi b. Hüseyin.
|