İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 109 Hüküm no: 68 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın bazı eşyalarını dâmadının babasına sattığı Mahmiye-i İslambol’da Çıkrıkçı Kemâl mahallesinde sâkin Mustafa Ağa b. Hüseyin meclis-i şer‘-i şerîf-i enverde dâmadının babası işbu bâ‘isü’l-kitâb es-Seyyid Mehmed Râkım b. es-Seyyid Ebîbekir tarafından vech-i âtî üzere vekîl-i şer‘îsi olan İbrahim Efendi [b.] Mehmed mahzarında ikrâr ve takrîr-i kelâm edip işbu hüccet-i şer‘iye nâtıka olduğu üzere kızım hâzıra bi’l-meclis Emine Hatun’dan iştirâ edip yedimde mâlım ve mülküm olan eşyâmdan bir orta keçesi ve sekiz yasdık ve üç minder ve bir şilte ve bir baş yasdık ve bir kapı perdesi ve bir ocak yaşmağı ve üç pencere perdesi ve iki mak‘ad ve üç tencere ve altı sahan ma‘a-kapak ve bir seccâde ve bir şorba tası ve bir kadayıf tepsisi ve bir ta‘âm sinisi ve bir leğen ma‘a-ibrik ve bir lenger ve bir tâbemi tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile müvekkil-i mezbûr es-Seyyid Mehmed Râkım Efendi’ye kırk guruşa bey‘ ve temlîk ve teslîm eylediğimde işbu vekîl-i mezbûr İbrahim Efendi dahi ber-vech-i muharrer bi’l-vekâle iştirâ ve temellük ve tesellüm eyledikden sonra semeni olan meblağ-ı mezkûr kırk guruşu müvekkil-i mezbûr es-Seyyid Mehmed Râkım Efendi mâlından vekîl-i mezbûr İbrahim Efendi yedinden işbu meclis-i şer‘de tamamen ve kâmilen ahz u kabz eyledim ba‘de’l-yevm eşyâ-i muharrere-i mezkûre müvekkil-i mezbûr es-Seyyid Mehmed Râkım Efendi’nin mülk-i müşterâsı ve hakk-ı sırfı olup kat‘a benim ve kızım hâzıra-i mezbûre Emine’nin alâka ve medhalimiz kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selh-i Rebî‘ülevvel sene 1184. Şuhûdu’l-hâl: Şâhidûnü’s-sâbıkūn.