İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 108 Hüküm no: 67 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın mehir, nafaka ve sâir evlilik hukukuyla alakalı olarak boşandığı kocasının zimmetini ibra ettiği Mahmiye-i İslambol’da Çıkrıkçı Kemâl mahallesinde sâkine ve zâtı ta‘rîf-i şer‘î ile mu‘arrefe olan Emine bt. Mustafa nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb es-Seyyid Mehmed Necib Efendi b. es-Seyyid Mehmed Râkım Efendi mahzarında ikrâr-ı tâm ve takrîr-i kelâm edip mezbûr es-Seyyid Mehmed Necib Efendi zevc-i dâhilim olup târih-i kitâb günü bâyînen beni tatlîk etmekle zimmetinde mütekarrir ve ma‘kūdün-aleyh olan elli guruş mehr-i müeccelim ile nafaka-i iddet ve meûnet-i süknâm için bi’t-terâzî beynimizde ta‘yîn olunan guruş ki cem‘an altmış guruş zevc-i mutallıkım mezbûr es-Seyyid Mehmed Necib Efendi işbu meclis-i şer‘de bana def‘ u teslîm eyledikde ben dahi bi’t-tamam ve’l-kemâl yedinden ahz u kabz edip hukūk-ı zevciyete ve matlûbum olan min-ciheti’l-karz yedi buçuk guruşa ve bir sîm tas ve bir zümrüd yüzüğe ve kıymetlerine ve bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan zevc-i mutallıkım mezbûr es-Seyyid Mehmed Necib Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete ve bi’l-cümle hukūk-ı sâireye müte‘allika âmme-i da‘vâdan benim zimmetimi ibrâ ve ıskāt ve herbirimiz âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selh-i Rebî‘ülevvel sene 1184. Şuhûdu’l-hâl: Ahmed Efendi b. Mehmed imâm-ı Ebulfeth, Molla Ahmed b. Ali, Yusuf Efendi b. Abdullah Sıdkı, Hüseyin Ağa b. Hasan, Mustafa b. Ahmed.