İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 113 Hüküm no: 70 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piyo v. Piyo’nun Hazînedâr Fırını ile değirmendeki gedik hissesini sattığı Habbâz tâifesinden olup mahmiye-i İstanbul’da Tavukpazarı kurbünde Hazînedâr Fırını Ustası Piyo v. Piyo nâm zimmî meclis-i şer‘-i şerîf-i enverde şerîki işbu bâ‘isü’l-kitâb Yakub v. İbrahim nâm kimesne mahzarında ikrâr-ı tâm ve takrîr-i kelâm edip sâlifü’z-zikr Hazînedâr Fırını demekle ma‘rûf beyne’l-ahâlî ma‘lûmü’l-hudûd bir bâb ekmekçi fırını ile ona merbût Sadefciler sûkunda Atîk Ali Paşa Câmi‘-i şerîfi havlusunda kâin üç horoslu değirmen derûnunda mevcûde iki re’s bargirler ile sâir ber-mûceb-i defter-i müfredât âlât-ı lâzıme ve eşyâ-i ma‘lûmenin on iki sehim i‘tibârıyla dört sehmi benim ve iki sehim mezbûr Yakub’un ve iki sehmi İstiko zimmînin ve iki sehmi Ahmed Beşe oğlunun şâyi‘an yedimizde mülk ve hakkımız olmağla ben zikrolunan fırın ve değirmende gedik ta‘bîr olunur bargirler ile sâir bi’l-cümle âlât-ı lâzıme ve eşyâ-i ma‘lûmeden ber-mûceb-i i‘tibâr-ı mezkûr mâlik olduğum dört sehim hisseme isâbet eden dört re’s bargirler ile âlât-ı lâzıme ve eşyâ-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile şerîkim mezbûr Yakub Beşe’ye beş yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr beş yüz guruşu yedinden tamamen ve kâmilen ahz u kabz edip bey‘-ı mezbûrun gabn ve tağrîrine ve istifâ-i semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik ba‘de’l-yevm sâlifü’z-zikr fırın ve değirmen derûnlarında mevcûd bargirler ve bi’l-cümle sâir âlât-ı lâzıme ve eşyâ-i ma‘lûmenin i‘tibâr-ı mezkûr ile altı sehmine isâbet eden altı re’s bargirler âlât-ı lâzıme ve eşyâ-i ma‘lûmeleriyle şerîkim mezbûr Yakub’un mülk-i sahîh ve hakk-ı sarîhi olup kat‘a benim alâka ve medhalim kalmamışdır dedikde gıbbe’t-tasdîkı’ş-şer‘î mezbûr Yakub şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a [bir] türlü vaz‘ u hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fî 5 Rebî‘ülâhir sene 1184. Şuhûdu’l-hâl: Ekmekçiler Kethudâsı Ali Ağa, es-Seyyid el-Hâc Ebûbekir, Kanlıfırın Ustası Ahmed Ağa, Yiğitbaşı Molla Osman, Acımusluklu Ahmed Usta b. Mehmed, Küçükpazar[lı] Molla Ali, Şehzâde Ustası Abdi Usta.