İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 114 Hüküm no: 71 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırın ustası Mogses ve ortaklarının alacak hususunda sulh oldukları Mahmiye-i İslambol’da Büyükkaraman’da vâki‘ ekmekçi fırını ustaları Mogses v. Bağdik ve şerîkleri Kazer v. Arakil ve Sahak v. Gaspar nâm zimmîler meclis-i şer‘-i şerîf-i enverde işbu bâ‘iseyi’r-rakīm İstefan v. Anton ve Hamparsom v. Agop nâm zimmîler muvâcehelerinde herbiri ikrâr ve takrîr-i kelâm edip fırın-ı mezkûra muttasıl zahrı tarafında vâki‘ ma‘lûmü’l-hudûd terbî‘an iki yüz zirâ‘ arsa Haremeyn-i Şerîfeyn Vakfı’ndan bi’l-icâreteyn bâ-temessük-i mütevellî mersûmân İstefan ve Hamparsom zimmîlerin ale’l-iştirâki’s-seviy tasarruflarında olmağla mersûmân İstefan ve Hamparsom zimmîler arsa-i mezkûre üzerine iki bâb oda ve tahtında ahır ve kenîf ve sokak kapısı ba‘de’l-binâ târih-i kitâbdan beher şehr on birer guruş kırkar akçeye bize îcâr ve teslîm eylediklerinde biz dahi ber-vech-i muharrer istîcâr ve tesellüm ve kabûl edip icâre-i mezkûre on birer guruş kırkar akçeyi beher şehr hitâmında mersûmân İstefan ve Hamparsom zimmîlere teslîm ve edâya ta‘ahhüd eylediğimizde onlar dahi râzılar olduklarından sonra mersûmân İstefan ve Hamparsom zimmîlerden beynimizde ma‘lûm üç yüz guruş masraf da‘vâmızdan bâ-tavassut-ı muslihîn yetmiş beş guruş bedel-i makbûza sulh olup mâ‘adâsına ve bi’l-cümle husûs-ı mezkûra müte‘allika âmme-i da‘vâdan mezbûrân İstefan ve Hamparsom zimmîlerden herbirinin zimmetlerini ibrâ-i âm ile ibrâ ve ıskāt edip onlar dahi ibrâyı kabûl eylediler dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 min-Rebî‘ülâhir sene 1184. Şuhûdu’l-hâl: Kanlıfırın Ustası Ahmed Ağa, Yiğitbaşı Molla Osman, Salıcı Molla Osman, Agop v. Serkiz, Hamparsom v. Takis, Kazer v. Haçuk.