İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 125 Hüküm no: 81 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Hamza Mescidi Vakfı’nın mütevellisi Rukiye Hatun’un İsmail Ağa’yı mütevellî kaymakamı tayin ettiği Dârü’l-hilâfeti’l-aliyye ve makarru’s-saltanati’s-seniyye’de câlis-i mesned-i şerî‘at-i garrâ olan efendiler hazerâtı nezâretlerinde âsûde evkāfdan olup mahmiye-i mezbûrede ve İpsala kasabasında vâki‘ ashâb-ı hayrâtdan merhûm Hoca Hamza Mescid-i şerîfleri evkāfının ber-vech-i meşrûta bâ-berât-ı âlîşân mütevelliyesi ve zâtı ta‘rîf-i şer‘î ile mu‘arrefe olan Rukiye Hatun bt. İsmail meclis-i şer‘-i şerîf-i enverde işbu bâ‘isü’l-kitâb es-Seyyid el-Hâc İsmail Ağa b. Ahmed mahzarında takrîr-i kelâm ve bast-ı merâm edip ben kasaba-i mezbûrede sâkine ve ihtiyâre ve alîle nisvân tâifesinden olup umûr-ı vakf-ı merkūmu rü’yete iktidârım olmamağla evkāf-ı mezkûreyi idâre ve rü’yete tarafımdan emânet ile ma‘rûf ve sadâkat ile mevsûf ve her vechile kāimmakāmlık uhdesinde gelmeğe kādir olan merkūm es-Seyyid el-Hâc İsmail Ağa’yı kāimmakām nasb ü ta‘yîn etmemle kıbel-i şer‘den dahi nasb ü ta‘yîn ve yedine vesîka dahi i‘tâ olunmak bi’t-tevliye matlûbumdur dedikde fi’l-hakīka kazıyye minvâl-i muharrer üzere olduğu zeyl-i vesîkada mektûbü’l-esâmî Müslimîn ihbârlarıyla lede’ş-şer‘i’l-enver müte‘ayyin olmağın bâlâ-yı kitâbı tevkī‘-i refi‘-i müstetâbı ile tezyîn eden hâkim-i hâsim-i vâlâ-cenâb efendi hazretleri dahi mezbûr es-Seyyid el-Hâc İsmail Ağa’yı evkāf-ı mezkûre umûrunu rü’yete mütevelliye-i mezbûrenin yerine kāimmakām-ı mütevellîyye nasb ü ta‘yîn buyurduklarında ol dahi kabûl ve ber-minvâl-i muharrer hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 28 Rebî‘ülâhir sene 1184. Şuhûdu’l-hâl: Abdi Ağa b. el-Hâc Ahmed, İbrahim Ağa b. Mehmed, es-Seyyid Ahmed Efendi b. Mehmed Said, Mehmed Çelebi b. İbrahim, es-Seyyid Yunus b. Davud.