İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 124 Hüküm no: 80 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun Vakfı’na ait menzilin birikmiş kira ücretinin kiracıları tarafından yeni mütevelliyesi Hadîce Hatun’a ödenmesi gerektiği Dârü’l-hilâfeti’l-aliyye ve makarru’s-saltanati’s-seniyye’de câlis-i mesned-i şerî‘at-i garrâ olan efendiler hazerâtı nezâretlerinde olan evkāfdan mahmiye-i mezbûrede Kasab İvaz mahallesinde vâki‘ merhûme Fâtıma Hatun Vakfı’ndan ber-vech-i âtî tevliyetini iddia eden zâtı ta‘rîf-i şer‘î ile mu‘arrefe olan bâ‘isetü’l-kitâb Hadîce Hatun bt. Ali meclis-i şer‘-i şerîf-i enverde vakf-ı mezbûr müstegallâtından olup mahmiye-i mezbûrede vâki‘ ber-mûceb-i temessük ma‘lûmü’l-hudûd ve’l-müştemilât bir bâb menzile bi’l-icâreteyn mutasarrıfe olan Hafîze Hatun bt. el-Hâc Ali’nin zevci ve tarafından husûs-ı âtîde vekîl olduğu zâtını ârifân İmâm el-Hâc Salih Efendi b. Mustafa ve Ahmed Çelebi b. Mehmed Sâdık şehâdetleriyle sâbit olan İbrahim b. Mustafa mahzarında üzerine da‘vâ ve takrîr-i kelâm edip işbu bir kıt‘a vakfiye-i ma‘mûlün-bihâ nâtık olduğu üzere vakf-ı mezbûrun ber-vech-i meşrûta mütevelliyesi olan Zeyneb Hatun fevt olup ve ben müteveffiye-i mezbûre Zeyneb Hatun’un li-ebeveyn kız karındaşı müteveffiye Ümmügülsüm Hatun’un sadriye kızı olmamla nevbet-i tasarruf-ı tevliyet-i mezbûre bana intikāl etmekle müvekkile-i mezbûre zimmetinde müctemi‘ olan menzil-i mezbûr icâresini taleb eylediğimde edâda mümâna‘at eder suâl olunup alıverilmesi matlûbumdur deyü da‘vâ ol dahi cevâbında menzil-i mezkûr vakf-ı mezbûrdan olup ve müteveffât-ı mezbûre Zeyneb Hatun ber-vech-i meşrûta mütevelliye olduğunu ikrâr lâkin müdde‘iye-i mezbûrenin müdde‘âsını ba‘de’l-inkâr müdde‘iye-i mezbûre Hadîce Hatun ber-minvâl-i [muharrer] mütevelliye-i müteveffiye-i mezbûre Zeyneb Hatun’un kız karındaşı müteveffât-ı mezbûre Ümmügülsüm’ün sadriye kızı olup tevliyet-i vakf-ı mezkûrun nevbet-i tasarrufu kendiye geldiğini Mustafa Çelebi b. Mehmed ve Hallâc Ali Çelebi b. Mustafa şehâdetleriyle bi’l-muvâcehe vech-i şer‘î üzere isbât etmeğin mûcibiyle icâre-i müctemi‘ayı müdde‘iye-i mezbûre Hadîce Hatun’a edâ ve teslîme vekîl-i mezbûra ba‘de’t-tenbîh müdde‘iye-i mezbûre Hadîce Hatun tevliyet-i vakf-ı mezkûra ber-vech-i meşrûta mutasarrıfe olmak üzere kıbel-i şer‘den işbu vesîka ketb ü tahrîr ve yedine i‘tâ olundu. Fî 25 Rebî‘ülâhir sene 1184. Şuhûdu’l-hâl: Mehmed Ağa b. Ahmed, Ali Çelebi b. Abdullah, el-Hâc Mustafa b. Hasan, Mehmed Emin b. Abdullah, Molla İsmail b. Ali.