İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 134 Hüküm no: 90 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. İsmail’in bir miktar para ile bazı eşya ve mücevherini kocasına hîbe ettiği Mahmiye-i İslambol’da Akşemseddin mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe olan Fâtıma bt. İsmail nâm hatun meclis-i şer‘-i şerîf-i enverde hâlâ zevci bâ‘isü’l-vesîka İbrahim Ağa b. İbrahim nâm kimesne mahzarında ikrâr-ı tâm ve takrîr-i kelâm edip zevcim mezbûr İbrahim Ağa’nın zimmetinde mütekarrir ve ma‘kūdün-aleyh olan elli guruş mehr-i müeccelim ile eşyâ-i memlûkemden nakden iki yüz elli guruşumu ve yirmi miskāl bir altın kuşak ve yirmi miskāl bir çift altın bilezik ve üç miskāl bir altın kuşak ve bir zümrüd küpe ve üç altın yüzük ve sîm sâ‘at ve beş sîm fincan zarfımı zevcim mezbûr İbrahim Ağa’ya hîbe-i sahîha-i şer‘iye ile hîbe ve temlîk ve teslîm eylediğimde ol dahi ber-vech-i muharrer meclis-i hîbede ittihâb ve temellük ve tesellüm ve kabûl eyledikden sonra sâir eşyâ-i memlûkemden on müsta‘mel kadife yasdık ve iki kumaş köşe yasdığı ve üç müsta‘mel çuka mak‘ad ve altı minder ve bir kapı perdesi ve sekiz müsta‘mel beledî yasdık ve üç yemenî mak‘ad ve iki seccâde ve sekiz yorgan ma‘a çârşeb ve bir keremsûd kaplı sincab kürk ve bir tamgahâneye kaplı müsta‘mel kakum kürk ve bir müsta‘mel kadife cübbe ve bir müsta‘mel şeridli şâlî cübbe ve bir şeridli şâlî biniş ve bir müsta‘mel çiçekli anteri ve bir Altınoluk anteri ve dört müsta‘mel anteri ve bir orta keçesi ve iki çuka ferâce ve üç miskāl inci ve iki ta‘âm sinisi ve bir kadayıf sinisi ve bir güğüm ve bir musluklu güğüm ve bir kazgan ve bir kebîr tencere ma‘a-kapak ve beş sagīr tencere ma‘a-kapak ve on beş sahan ma‘a-kapak ve iki bakır mangal ve üç kahve ibriği ve bir kahve tepsisi ve bir şorba tası ve beş fağfûrî fincanımı dahi tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile zevcim mezbûr İbrahim Ağa’ya dört yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr dört yüz guruş mutâlebesinden zevcim mezbûr İbrahim Ağa’nın zimmetini ibrâ-i âmm-ı sahîh-i şer‘î ile ibrâ ve ıskāt eyledim fîmâ-ba‘d nakid ve eşyâ-i muharrere-i mezkûre zevcim mezbûr İbrahim Ağa’nın hîbeten ve şirâen mülkü ve hakkı olup benim kat‘a alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 Cumâdelûlâ sene 1184. Şuhûdu’l-hâl: İmâm Mehmed Efendi b. Mustafa, es-Seyyid Mehmed b. el-Hâc Abdurrahman, Ali Çelebi b. Abdullah, es-Seyyid Ahmed b. Ali.