İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 133 Hüküm no: 89 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Beşe’nin borçlarını ödemek üzere Malta Çarşısı’ndaki ekmekçi fırını ve değirmen gediğinin satıldığı Mahmiye-i İslambol’da Sultân Mehmed Han Câmi‘-i şerîfi civârında Malta Çarşısı’nda vâki‘ ekmekçi fırını ustası olup vilâyet-i Rumeli’nde Debre kazâsına tâbi‘ Plevne nâm karyede sâkin Bayram Beşe b. Ali b. Hüseyin nâm kimesne tarafından ber-vech-i âtî vekâlet iddia edip mahmiye-i mezbûrede Hocapaşa kurbünde simidci dükkânında sâkin İbrahim b. İbrahim nâm kimesne meclis-i şer‘-i şerîf-i enverde Ali b. Hasan ve Mehmed b. İlyas ve diğer Bayram b. Haydar nâm kimesneler mahzarlarında üzerlerine da‘vâ ve takrîr-i kelâm edip mezbûr Bayram Beşe müstakillen yedinde mülk ve hakkı olup sâlifü’l-beyân ekmekçi fırını ile fırın-ı mezkûra merbût ve müte‘ayyin mahmiye-i mezbûrede Etmeydânı kurbünde kâin Kavakdibi demekle ma‘rûf dört horoslu değirmenin beyne’l-hiref gedik i‘tibâr olunan on altı re’s bargir ve bi’l-cümle âlât-ı lâzıme-i ma‘lûmesini ba‘de’n-nidâ ve’l-müzâyede ve gıbbe inkıtâ‘ı’r-rağbe semen-i misli ile âhara bey‘ ve kabz-ı semen ve semenini kapan tüccârından ma‘lûmü’l-esâmî kimesnelere olan düyûnuna edâya ve bunlar mütevakkıf olduğu umûrun küllîsine işbu yedimde olan bir kıt‘a vekâlet hücceti mantûkunca tarafından şuhûd mahzarında beni vekîl ve nâib-i menâb nasb ü ta‘yîn eyledikde ben dahi vekâlet-i mezkûreyi kabûl ve merâsimini edâya ta‘ahhüd ve iltizâm eylediğime binâen zikrolunan fırın ve değirmenin gedik i‘tibâr olunan bargirler ile âlât-ı lâzıme-i ma‘lûmeyi Kapan-ı dakīk’de nidâ ve müzâyede etdirip ragabât-ı nâs bi’l-külliye münkatı‘a oldukdan sonra sâlifü’z-zikr gedik i‘tibâr olunan bargirler ile âlât-ı lâzıme-i ma‘lûme mezbûrûn Ali ve Mehmed ve diğer Bayram üzerlerinde sekiz yüz guruşda karâr ve ziyâde ile tâlib-i âharı zuhûr etmeyip [34a] ve meblağ-ı mezbûr zikrolunan fırın ve değirmenin gedik i‘tibâr olunan bargirler ve bi’l-cümle âlât-ı lâzıme-i ma‘lûmenin el-yevm semen-i misli idüğü şer‘an sâbit olmağla ben sâlifü’z-zikr fırın ve değirmenin gedik i‘tibâr olunan bargir ve bi’l-cümle âlât-ı lâzıme-i ma‘lûmeyi tarafeynden îcâb ve kabûlü hâvî bey‘-ı kat‘î ve safka-i vâhide ile mezbûrûn Ali ve Mehmed ve diğer Bayram’a mütesâviyen semen-i misli olan meblağ-ı mezkûr sekiz yüz guruşa bey‘ ve temlîk ve teslîm onlar dahi ber-vech-i muharrer iştirâ ve temellük ve tesellüm etmeğin hâlâ meblağ-ı mezkûr sekiz yüz guruşu mezbûrûn Ali ve Mehmed ve diğer Bayram’dan vekâlet-i mahkiyem hasebiyle taleb ederim suâl olunsun dedikde gıbbe’s-suâl mezbûrûn Ali ve Mehmed ve diğer Bayram cevâblarında zikrolunan fırın ve değirmenin gedik i‘tibâr olunan bargir ve âlât-ı lâzıme-i ma‘lûmeyi müdde‘î-i mezbûr İbrahim’den ber-vech-i muharrer iştirâ eylediklerini ikrâr lâkin müdde‘î- i mezbûrun vekâlet-i mezkûresini inkâr edicek müdde‘î-i mezbûrdan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve karye-i mezbûre ahâlîsinden olup mahmiye-i mezbûrede Küçükpazar’da ekmekçi fırınında sâkinler ekmekçi Molla Ali b. Hüseyin ve Pişirici Uzun Mehmed b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka hâlâ Debre kazâsına tâbi‘ Plevne nâm karyede sâkin Bayram Beşe b. Ali b. Hasan nâm kimesne yedinde mülk ve hakkı olup mahmiye-i mezbûrede Sultân Mehmed Han Câmi‘-i şerîfi civârında Malta Çarşısı’nda vâki‘ ekmekçi fırını ile ona merbût ve müte‘ayyin mahmiye-i mezbûrede Etmeydânı kurbünde kâin Kavakdibi demekle ma‘rûf dört horoslu değirmen derûnunda gedik i‘tibâr olunan on altı re’s bargir ve bi’l-cümle sâir âlât-ı lâzıme-i ma‘lûmesini semen-i misli ile âhara bey‘ ve kabz-ı semen ve semenini kapan tüccârından ma‘lûmü’l-esâmî kimesnelere olan düyûnuna edâya ve bunlar mütevakkıf olduğu umûrun küllîsine tarafından bizim huzûrumuzda işbu müdde‘î-i mezbûr İbrahim’i vekîl ve nâib-i menâb nasb ü ta‘yîn eyledikde ol dahi vekâlet-i mezkûreyi kabûl ve merâsimini edâya ta‘ahhüd ve iltizâm eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm ve’t-tenbîh vekîl-i mezbûr İbrahim yine meclis-i şer‘de işbu ashâbü’l-kitâb mezbûrûn Ali ve Mehmed ve diğer bayram mahzarlarında ikrâr-ı tâm ve takrîr-i kelâm edip ânifen edâsına hükm-i şer‘î lâhık olan semen-i mezkûr sekiz yüz guruşu mezbûrûn Ali ve Mehmed ve Bayram bana edâ ve teslîm ben dahi yedlerinden bi’l-vekâle tamamen ve kâmilen ahz u kabz eyledim ba‘de’l-yevm sâlifü’l-beyân fırın ve değirmenin gedik i‘tibâr olunan bargirler ve bi’l-cümle âlât-ı lâzıme-i ma‘lûmesini mezbûrûn Ali ve Mehmed ve diğer Bayram’ın ale’l-iştirâki’s-seviy mülk-i müşterâları ve hakk-ı sırfları olup müvekkilim mezbûr Bayram Beşe’nin kat‘a alâka ve medhali kalmamışdır diledikleri gibi mutasarrıf olsunlar dedikde gıbbe’t-tasdîkı’ş-şer‘î mezbûrûn Ali ve Mehmed ve diğer Bayram şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ u hareket etmemek üzere ta‘ahhüd etmeleriyle mâ-vaka‘a bi’t-taleb ketb olundu. Fî 3 Ca sene 1184. Şuhûdu’l-hâl: Ekmekçiler Kethudâsı Ali, Yiğitbaşı Molla Osman, Salıcı Molla Osman.