İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 136 Hüküm no: 92 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un Arabacı Bâyezid mahallesinde babasından intikal eden mülk menzil hissesini annesine sattığı Husûs-ı âti’l-beyânın mahâllinde ketb ü tahrîr i iltimâs olunmağın savb-ı şer‘-i enverden irsâl olunan Bekirzâde Abdullah Efendi mahmiye-i İstanbul’da Taşkasab kurbünde Çavuş Mescidi mahallesinde sâkin Maden Kalemi Halîfesi mefharü erbâbü’[t-] tahrîr ve’l-kalem el-Hâc Mustafa Efendi b. Ahmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Arabacı Bâyezid mahallesinde sâkin iken bundan akdem fevt olan Mukābele Süvâri Kalemi kâtiblerinden Mehmed Emin Efendi b. Ahmed Çavuş’un verâseti zevce-i metrûkesi Sâliha Hanım bt. el-mûmâ-ileyh el-Hâc Mustafa Efendi ve sulbiye kızları Fâtıma Hanım ve Rukiye Hanım’a ve li-ebeveyn er karındaşı Mustafa Memiş Efendi ile li-ebeveyn kız karındaşı Hanife Hatun’a münhasıra ve mes’ele-i mirasları yetmiş iki sehimden olup sihâm-ı mezbûreden dokuz sehmi zevce-i mezbûre Sâliha Hanım’a ve yirmi dörder sehmi mezbûretân Fâtıma Hanım ve Rukiye Hanım’dan herbirine ve bâkī on beş sehimden? on sehmi merkūm Mustafa Memiş Efendi’ye ve beş sehmi mezbûre Hanife Hatun’a isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Fâtıma Hanım meclis-i ma‘kūd-ı mezkûrda vâlidesi bâ‘isetü’l-vesîka mezbûre Sâliha Hanım’ın babası ve tarafından husûs-ı âti’l-beyânı tasdîka vekîl-i şer‘îsi olan mûmâ-ileyh el-Hâc Mustafa Efendi mahzarında ikrâr-ı tâm ve takrîr-i kelâm edip mârrü’z-zikr Arabacı Bâyezid mahallesinde vâki‘ bir tarafdan Fâtıma Molla Kadın tasarrufunda olan vakıf menzil ve iki tarafdan tarîk-i âm ile mahdûd hâriciyede fevkānî dört bâb oda ve bir sofa ve dehliz ve tahtında ahır ve kenîf ve bi’r-i mâ ve havlu ve dâhiliyede fevkānî yedi bâb oda ve dîvânhâne ve kenîf ve tahtânî iki bâb oda ve bir kârgir matbah [35b] ve köşk ve havuz ve hamam ve câmekân odası ve iki bi’r-i mâ ve eşcârlı bağçeyi müştemil bir bâb kebîr mülk menzil dört sehim i‘tibârıyla bir sehim benim ve bir sehmi kız karındaşım mezbûre Rukiye Hanım’ın ve bir sehmi vâlidem müvekkile-i mezbûre Sâliha Hanım’ın ve bir sehmi dahi babam mûrîsimiz müteveffâ-yı mezbûrun ilâ-vefâtihî yedinde mülkü ve hakkı olup ve ba‘de vefâtihî tashîh-i mezkûr üzere benimle verese-i merkūmûna mevrûs olmağın ol vechile mecmû‘-ı menzil-i mahdûd-ı mezkûr iki yüz seksen sekiz sehim i‘tibârıyla seksen bir sehim vâlidem müvekkile-i mezbûre Sâliha Hanım’ın ve doksan altı sehmi kız karındaşı mezbûre Rukiye Hanım’ın ırsen ve şirâen mülkleri ve on sehmi merkūm Mustafa Efendi’nin ve beş sehmi mezbûre Hanife Hatun’un ırsen mülkleri ve doksan altı sehmi dahi akd-i âti’z-zikrin sudûruna değin benim yedimde ırsen ve şirâen mülküm olmağla ben menzil-i mahdûd-ı mezkûrdan i‘tibâr-ı sânî-i mezkûr üzere ırsen ve şirâen mâlike olduğum doksan altı sehim hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile vâlidem müvekkile-i mezbûre Sâliha Hanım’a yedi yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yedi yüz guruşu vâlidem müvekkile-i mezbûre Sâliha Hanım yedinden bi’t-tamam ve’l-kemâl ahz u kabz ve kendi umûruma sarfla istihlâk eyledim fîmâ-ba‘d menzil-i mahdûd-ı mezkûrun i‘tibâr-ı sânî-i mezkûre üzere yüz yetmiş yedi sehmi vâlidem müvekkile-i mezbûre Sâliha Hanım’ın ırsen ve şirâen mülk-i sahîh ve hakk-ı sarîhi olup benim kat‘a alâka ve medhalim kalmamağla bey‘-ı mezkûrun gabn ve tağrîrine ve bi’l-cümle husûs-ı mezkûra müte‘allika âmme-i da‘vâdan vâlidem müvekkile-i mezbûre Sâliha Hanım’ın zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb ü imlâ olundu. Fî 8 Ca sene 1184. Şuhûdu’l-hâl: Muhzır Mehmed Çelebi b. Mustafa, Ahmed Ağa b. el-Hâc Mustafa, Süleyman b. Abdullah, İbrahim b. Ali, Mustafa, Çukadâr Ali Ağa b. Salih, Hasan Ağa b. Yusuf, el-Hâc Halil b. el-Hâc Mustafa.