İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 137 Hüküm no: 93 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mollacıkzâde İshak Efendi’nin mülk menzilini Hekim Kutbeddin Vakfı’na on beş bin kuruşa sattığı Bâ-mühr-i Bâb nâibi efendi Dârü’l-hilâfeti’l-aliyye Kostantıniyye el-mahmiye’de hâlâ mesned-ârâ-yı şerî‘at-ı garrâ olan a‘lemu ulemâ’i’l-izâm efdalü’l-fudalâi’l-fihâm sa‘âdetlü fazîletlü Mollacıkzâde İshak Efendi b. el-merhûm Mehmed Efendi tarafından husûs-ı âti’l-beyânda vekîl olduğu Eyyûbî Ali Ağa b. Abdurrahman ve Ahmed Ağa b. Hüseyin şehâdetleriyle sâbit olan kethudâları kuzât-ı kirâmdan Ali Efendi b. Osman meclis-i şer‘-i şerîf-i enverde ashâb-ı hayrâtdan merhûm Hekîm Kutbeddin Vakfı’nın mütevellîsi ve vakfından hâsıla gallenin ziyâ‘ ihtimaline binâen kıbel-i şer‘den akāra tebdîline me’zûn olan müderrisîn-i kirâm-ı zevi’l-ihtirâmdan işbu sahibü’l-kitâb mahdûm-ı mükerrem Mehmed Besim Efendi mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin müvekkilim müşârün-ileyh hazretlerinin bâ-hüccet-i şer‘iye silk-i mülk-i sahîhlerinde münselik emlâklerinden olup mahmiye-i mezbûrede Şirmerd Çavuş ve Kiçi Hatun mahalleleri beynlerinde vâki‘ bir tarafdan ba‘zen Râkım Mehmed Paşa Vakfı’ndan hâriciye ta‘bîr olunur müvekkilim müşârün-ileyh hazretlerinin tasarruflarında olan menzil ve ba‘zen Maden Halîfesi Mustafa Efendi menzili ve bir tarafdan ba‘zen tarîk-i âm ve ba‘zen İbrahim Ağa Vakfı’ndan terbî‘an dört yüz doksan zirâ‘ yine müvekkilim müşârün-ileyhin tasarruflarında olan bahçe arsası ve bir tarafdan ba‘zen yine mezbûr İbrahim Ağa Vakfı’ndan Ali Efendi tasarrufunda olan arsa ve ba‘zen yine merkūm Ali Efendi menzili ve bir tarafdan tarîk-i âm ile mahdûd tûlen ve arzen be-hesâb-ı terbî‘î dört bin sekiz yüz yetmiş zirâ‘ arsa üzerinde mebnî tabaka-i selâse i‘tibârıyla ulyâda altı bâb oda ve iki sofa ve bir hazîne odası ve iki camlı sofa ve cihân-nümâ ve dîvânhâne ve âbdesthâne ve üç kenîf ve vüstâda yedi bâb oda ve bir hazîne odası ve bir kârgir matbah ve su hazînesi ve hamam ve câmekân odası ve dehliz ve âbdesthâne ve dört kenîf ve süflâda bir kârgir mahzen ve taş döşemeli sofa ve bir bâb oda ve iki zîr-i zemîn mahzen ve iki mâ’-i lezîz bacası ve bi’r-i mâ ve kürûm gars olunmuş ve sâir eşcâr-ı müsmire ve gayr-ı müsmireli bahçeyi müştemil dâhiliye ta‘bîr olunur mülk menzillerini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile vakf-ı mezbûr için mütevellî-i mûmâ-ileyh Mehmed Besim Efendi’ye on beş bin guruşa bi’l-vekâle bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûrun iki bin iki yüz guruşunu galle-i vakf-ı mezbûrdan mütevellî-i mûmâ-ileyh yedinden bi’l-vekâle ahz u kabz edip sâlifü’l-beyân dâhiliye ta‘bîr olunur menzil-i mahdûd-ı mezkûr cemî‘ müştemilâtıyla vakf-ı merkūm müstegallâtından oldukdan sonra mütevellî-i mûmâ-ileyh bir kıt‘a temessük mantûkunca menzil-i mahdûd-ı mezkûru fâriğan ani’ş-şevâgil on iki bin sekiz yüz guruş icâre-i mu‘accele ve yevmi altı akçe icâre-i müeccele ile cânib-i vakıfdan bi’t-tevliye müvekkilim müşârün-ileyh hazretlerine îcâr ve teslîm ve semeninden [36b] bâkī on iki bin sekiz yüz guruşu icâre-i mu‘accele-i mezkûr on iki bin sekiz yüz guruşa takās ve mahsûb eyledikde ben dahi ber-vech-i muharrer bi’l-vekâle istîcâr ve tesellüm ve mukāssa ve kabûl edip bey‘-ı mezbûrun gabn ve tağrîrine ve icâre-i mu‘accele-i mezkûrenin adem-i istifâsına müte‘allika âmme-i da‘vâdan cânib-i vakfı ve zimmet-i mütevellî-i mûmâ-ileyhi vekâleten ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurret-i Ca sene 1184. Şuhûdu’l-hâl: Müderrisîn-i kirâmdan Hâşim es-Seyyid Mehmed Efendi el-muhâsib, İmâmzâde el-Hâc Abdülhakîm Efendi b. ( ) kâtib-i vakf, Mustafa Beyefendi b. ( ), Molla Mehmed b. Abdullah muhzır-ı muhâsebe.