İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 159 Hüküm no: 117 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa’nın menzil satışı hususunda kayınvalidesiyle sulh olup birbirlerinin zimmetlerini ibra ettikleri Mahmiye-i İstanbul’da Avratpazarı kurbünde Hobyar mahallesinde sâkin es-Seyyid Mustafa b. Mehmed nâm kimesne meclis-i şer‘-i şerîf-i enverde kayınanası mu‘arrefetü’z-zât işbu râfi‘atü’l-kitâb Âişe bt. Abdullah nâm hatun mahzarında ikrâr ve takrîr-i kelâm edip mârrü’z-zikr Hobyar mahallesinde vâki‘ bir tarafdan ba‘zen Karakız demekle ma‘rûf Mehmed Ağa menzili ve ba‘zen Ispanahcı bahçesi ve bir tarafdan İmâmzâde kerîmesi Vakfı’ndan sagīr menzili ve bir tarafdan ba‘zen Hâfız Mustafa Efendi menzili ve ba‘zen tarîk-i âm ile mahdûd fevkānî üç bâb oda ve bir sofa ve dehliz ve bir kahve odası ve tahtında bir hâriciye odası ve matbah ve sofa ve bi’r-i [ma] ve havlu ve eşcâr-ı müsmireli bahçe ve müştemilât-ı sâireyi hâvî mecmû‘u terbî‘an iki bin sekiz yüz zirâ‘ arsalı mülk menzilin iki yüz elli zirâ‘ mahâll-i ma‘lûmu ve mâ‘adâsı dahi yüz yirmi sehim i‘tibârıyla elli bir sehm-i şâyi‘i kayınanam mezbûre Âişe Hatun’un yedinde mülkü iken bundan akdem bana deyni olan iki bin guruş mukābelesinde bey‘ ve temlîk ve teslîm etmişidi hâlâ kayınanam mezbûre Âişe Hatun şurût-ı fâsid ile bey‘ eyledim deyü benden geri taleb ve da‘vâya tesâddî birle beynimizde münâza‘ât-ı kesîre cereyân etmişidi el-hâletü hâzihî zikrolunan iki yüz elli zirâ‘ mahalli ile elli bir sehimden on beş sehm-i şâyi‘ini bi-tarîkı’l-musâlaha kayınanam mezbûre Âişe Hatun’a geri def‘ ve temlîk ve teslîm eylediğimde ol dahi ahz u kabz ve kabûl edip da‘vâ-yı mezkûresinden rızâsıyla fâriğa oldukdan sonra ben menzil-i mezkûrun iki bin elli zirâ‘ mahâlline ve elli bir sehimden on beş sehmine ve meblağ-ı mezkûr iki bin guruşa müte‘allika âmme-i de‘âvî ve kâffe-i mutâlebât ve eymân ve muhâsamâtdan kayınanam mezbûre Âişe Hatun’un zimmetini ibrâ ve ıskāt eyledim ol dahi yedimde kalan elli bir sehimden otuz altı sehmine müte‘allika âmme-i da‘vâdan benim zimmetimi kezâlik ibrâ ve ıskāt ve herbirimiz âharın ibrâsını kabûl eyledik fîmâ-ba‘d menzil-i mahdûd-ı mezkûrun mârrü’z-zikr iki yüz elli zirâ‘ mahalli ile zikrolunan elli bir sehimden on beş sehm-i şâyi‘i kayınanam mezbûre Âişe Hatun’un kemâ-fi’l-evvel mülkü olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Recebi’l-ferd sene 1184. Şuhûdu’l-hâl: Mehmed Ağa b. Hüseyin, Ali Ağa b. el-Hâc Mehmed, Abdullah Ağa b. İbrahim, Mustafa b. Mustafa, el-Hâc Ahmed b. el-Hâc Rasûl ve gayruhum.