İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 158 Hüküm no: 116 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Seyyid Mehmed Çelebi’nin bir fırın ve değirmendeki gedik hisselerini sattığı Mahmiye-i İstanbul’da Alacahamam kurbünde Çelebioğlu mahallesinde sâkin kapan tüccârından es-Seyyid Mehmed Çelebi b. el-Hâc Ahmed meclis-i şer‘-i hatîr-i lâzımü’t-tevkīrde habbâz tâifesinden olup husûs-ı âti’z-zikrde kendi nefsinden asîl ve Vartan v. Murad nâm zimmî tarafından vekîl-i sâbitü’l-vekâlesi olan işbu hâmilü’r-rakīm Kazer v. Aram nâm zimmî muvâcehesinde ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olup medîne-i Ebî Eyyûb-i Ensârî -aleyhi rahmeti’l-bârî- câmi‘-i şerîfi civârında vâki‘ Osman Bey Fırını demekle ma‘rûf bir bâb fırın derûnunda mevcûd gedik ta‘bîr [olunur] âlât-ı lâzıme-i ma‘lûme ile fırın-ı merkūma merbût yine medîne-i mezbûrede Servi mahallesinde vâki‘ lede’l-ahâlî ve’l-cîrân ma‘lûmü’l-hudûd üç horos[lu] bir bâb değirmen derûnunda mevcûd kezâlik gedik ta‘bîr olunur on iki bargir ve sâir âlât-ı lâzıme-i ma‘lûmemi tarafeynden îcâb ve kabûlü hâvî bey‘-ı bâtt-ı sahîh-i şer‘î ve safka-i vâhide ile dört sehim i‘tibârıyla üç sehim hisseye isâbet eden dokuz re’s bargir ile sâir âlât-ı lâzıme-i ma‘lûmeyi asîl-i merkūm Kazer’a bin yirmi guruşa ve bir sehim hisseye isâbet eden üç bargir ve sâir âlât-ı lâzıme-i ma‘lûmeyi müvekkil-i merkūm Vartan’a üç yüz kırk guruşa bey‘ ve temlîk ve teslîm eyledikde merkūm Kazer dahi bi’l-asâle ve bi’l-vekâle iştirâ ve temellük ve tesellüm ve kabz ve kabûl eylediğinden sonra semeni olan cem‘an bin üç yüz altmış guruşu merkūm Kazer asâleten ve vekâleten bana def‘ u teslîm ben dahi yedinden tamamen ahz u kabz eylediğimden sonra bey‘-ı mezkûrun tağrîr ve gabnine müte‘allika âmme-i de‘âvî ve mutâlebât ve kâffe-i eymân ve muhâsamâtdan merkūmân Kazer ve Vartan’ın zimmetlerini ibrâ ve ıskāt edip ol dahi bana medfû‘u olan meblağ-ı mezkûra müte‘allika da‘vâdan benim zimmetimi kezâlik ibrâ ve ıskāt ve herbirimiz ibrâsını kabûl eyledik fîmâ-ba‘d mârrü’z-zikr fırın ve değirmende gedik ta‘bîr olunur âlât-ı lâzıme-i mezkûre dört sehim i‘tibârıyla üç sehmi merkūm Kazer ve [bir] sehmi merkūm Vartan’ın şâyi‘an mülk-i müşterâları ve hakk-ı sırfları olup benim kat‘a alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Recebi’l-ferd sene 1184. Şuhûdu’l-hâl: Ekmekçiler Kethudâsı Ali Ağa b. Abdullah, Ahmed Ağa b. Hüseyin, Kethudâ-yı Muhzırân Mehmed Ağa b. Ahmed, Ali Çelebi b. Abdullah, İsmail Çelebi b. Ali.