İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 161 Hüküm no: 119 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Celep Argili’nin beytülmâl tarafından zapt olunan terekesinin verâsetlerini ispat eden vârislerine teslim olunduğu Vilâyet-i Rumeli’nde İnebahtı kazâsına tâbi‘ Buhuraki nâm karye ahâlîsinden olup vilâyet-i Rumeli’de medîne-i Ruscuk nâm-ı diğer Tekfurdağı kasabasına tâbi‘ Yeniköy nâm karyede müsâferet etmeğin iken bundan [akdem] hâlik olan celeb tâifesinden Kaysunoğlu demekle ma‘rûf Argili v. Yorgi nâm zimmîden verâset iddia eden işbu hâmilü’r-rakīm sulbî kebîr oğlu Yorgi ile zevcesi olup sagīr oğlu Dimitri’nin anası ve kıbel-i şer‘den mansûbe vasîsi olan Agrob bt. Dimo nâm Nasrâniye asâleten ve vesâyeten meclis-i şer‘-i şerîf-i enverde hâlik-i mesfûr[un] zâhirde vâris-i ma‘rûfu olmayıp terekesi cânib-i beytü’l-mâle âid olmak zu‘muyla mahmiye-i İstanbul’da bundan akdem hâssa beytü’l-mâlı emîni olup hâlik-i mesfûrun terekesine bi’l-emâne vaz‘-ı yed eden Mustafa Ağa b. Hasan mahzarında herbiri üzerine da‘vâ ve takrîr-i kelâm edip hâlik-i mesfûr Argili v. Yorgi nâm zimmînin biz hasren vârisi olup bizden gayrı vâris ve terekesine müstahıkk-ı âharı olmamağla mezbûr Mustafa Ağa’nın yedinde olan defter-i kassâm mantûkunca ba‘de ihrâci’l-mesârif makbûzu olan beş yüz doksan dört guruşu taleb ederim suâl olunsun dedikde emîn-i mezbûr cevâbında hâlik-i mesfûrun terekesi olmak üzere bi’l-emâne ol mikdâr meblağa vaz‘-ı yedini ikrâr lâkin müdde‘iyân-ı mezbûrânın verâsetini inkâr edicek müdde‘iyân-ı mezbûrândan ber-vech-i muharrer müdde‘âlarına mutâbık beyyine taleb olundukda udûl-i ahrâr-ı ricâl-i Müslimînden el-Hâc Mehmed Ağa b. el-Hâc Halil ve İsmail Ağa b. Ali ve es-Seyyid Mustafa Ağa b. İbrahim nâm kimesneler ile Yani v. Dimo ve diğer Yani v. Tanaş ve Todori v. Vasil nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka hâlik-i mesfûrun merkūm Yorgi sulbî kebîr oğlu ve merkūme Agrob zevcesi ve Dimitri sagīr oğlu olup mesfûrûndan gayrı vâris ve terekesine müstahıkk-ı âharı olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-tezkiye şehâdetleri makbûle olmağın mûcibiyle ba‘de’l-hükm ve’t-tenbîh merkūmân Yorgi ve Agrob asâleten ve vesâyeten yine meclis-i şer‘de iâde-i kelâm edip ânifen edâsına tenbîh olunan meblağ-ı merkūm beş doksan dört guruşu emîn-i merkūm Mustafa Ağa bize def‘ u teslîm biz dahi yedinden tamamen ahz u kabz eyledik fîmâ-ba‘d meblağ-ı merkūmdan emîn-i merkūm Mustafa Ağa yedinde ve zimmetinde bir akçe ve bir habbe bâkī kalmadı dediklerinden sonra Tophâne’de Firuzağa mahallesinde Bakkāl Yani v. Dimo ve Tophânekapısı hâricinde Todori v. Vasil ve Bahçekapısı hâricinde bakkāl olan Yani v. Tanaş nâm zimmîler meclis-i ma‘kūd-ı mezkûrda hâlik-i merkūmun vâris-i âharı ve terekesine müstahık zuhûr edip mezbûr Mustafa Ağa’dan taleb ve da‘vâ ve nesne ahz eder ise me’hûzlarına biz kefîl ve zâminiz dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurret-i Şa‘bân sene 1184. Şuhûdu’l-hâl: el-Hâc Mehmed Ağa b. el-Hâc Halil, İsmail Ağa b. Ali, es-Seyyid Mustafa b. İbrahim, el-Hâc Mustafa b. el-Hâc Ali.