İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 184 Hüküm no: 145 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhûm Hasan Usta’nın bir fırın ile değirmendeki gedik hissesinin vârisleri tarafından satıldığı Mahmiye-i İstanbul’da Kumkapı Nişâncısı mahallesinde vâki‘ el-Hâc Hasan Usta Fırını demekle ma‘rûf bir bâb habbâz fırını ve ona merbût Etmeydânı kurbünde Kazgancı Sadi mahallesinde vâki‘ Karabatak Değirmeni demekle ma‘rûf dört horos değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla sekiz sehmi Ömer Beşe b. Abdullah ile Yankula v. Miho’nun ve dört sehmi Hadîce bt. Abdullah nâm hatunun ve dört sehmi mezbûr Hadice’nin zevci el-Hâc Hasan Usta b. Mahmud nâm kimesnenin yedlerinde şâyi‘an mülkleri olup mezbûr el-Hâc Hasan Usta mârrü’z-zikr Kazganî Sadi mahallesinde sâkin iken bundan akdem vefât edip verâseti vasiyet bi’s-sülüs zevce-i menkûha-i metrûkesi mezbûre Hadîce bt. Abdullah nâm hatuna ve li-ebeveyn er karındaşı oğlu Hüseyin b. Ahmed’e münhasıra olduğu lede’ş-şer‘i’l-enver zâhir oldukdan sonra müteveffâ-yı mezbûrun sülüs vesâyâsını tenfîze vasîyy-i muhtârı olan es-Seyyid Osman Ağa b. Ahmed nâm kimesne ve zevce-i metrûkesi olup zâtı şer‘an mu‘arrefe olan mezbûre Hadîce ve mezbûr Hüseyin meclis-i şer‘-i şerîf-i enverde işbu râfi‘u’l-kitâb mezbûrân Ömer Beşe ve Yankula mahzarlarında herbiri bi’l-vesâye ve bi’l-asâle ikrâr ve takrîr-i kelâm edip bâlâda zikrolunan fırın ve değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on [altı] sehim i‘tibârıyla dört sehmi mûrisimiz müteveffâ-yı mezbûr el-Hâc Hasan Usta’nın ile’l-vefât yedinde mülkü olup ba‘de vefâtihî ber-vech-i muharrer hasran bize mevrûs olmağla hâlâ biz mülk-i mevrûsumuz olan mârrü’z-zikr dört sehim hisse-i [50b] şâyi‘amızı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile altı yüz altmış yedi guruşa mezbûrân Ömer Beşe ve Yankula[‘ya] alâ iştirâki’s-seviy bi’l-vesâye ve bi’l-asâle bey‘ ve temlîk ve teslîm eylediğimizde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr altı yüz altmış yedi guruşu yedlerinden tamamen ahz u kabz edip bi-kadri’l-hısas beynimizde iktisâm eyleyip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr fırın ve değirmen derûnunda mevcûd on altı re’s bargir ve sâir âlât-ı lâzıme-i ma‘lûmede olan dört sehim hisse-i şâyi‘amız dahi mezbûrân Ömer Beşe ve Yankula’nın mülk-i müşterâları ve hakk-ı sırfları olmuşdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Zilhicceti’ş-şerîfe sene 1184.x Şuhûdu’l-hâl: Molla Hasan b. Abdullah, Molla Mustafa b. el-Hâc Mehmed, Ahmed Ağa b. Hüseyin, es-Seyyid el-Hâc Ebûbekir Ağa b. el-Hâc Mehmed, Salıcı Molla Osman b. Mustafa, Ekmekçiler Kethudâsı Ali Ağa b. Abdurrahman, Molla Ahmed b. Şahin.