İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 183 Hüküm no: 144 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Yani’nin bir değirmendeki yarım gedik hissesini sattığı Habbâz tâifesinden Yani v. Todori nâm zimmî meclis-i şer‘-i şerîf-i enverde yine tâife-i mezbûreden işbu râfi‘u’l-kitâb Bediroğlu demekle ma‘rûf Molla Ahmed b. el-Hâc Mustafa mahzarında ikrâr ve takrîr-i kelâm edip mahmiye-i İslambol’da Müftühamamı kurbünde vâki‘ iki horos bir bâb değirmen derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûmenin nısfı Koca Yani nâm zimmînin ve nısf-ı âharı akd-i [âti]’z-zikrin [sudûruna değin] yedimde şâyi‘an mülk ve hakkım olmağla hâlâ ben dört re’s bargir ile sâir âlât-ı lâzıme-i ma‘lûmede olan nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile dört yüz guruşa mezbûr Molla Ahmed’e bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr dört re’s bargir ile sâir âlât-ı lâzıme-i ma‘lûmenin nısf hisse-i şâyi‘aları mezbûr Molla Ahmed’in mülk-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Muharremi’l-harâm sene 1185. Şuhûdu’l-hâl: Ahmed Ağa b. Hüseyin, es-Seyyid el-Hâc Ebûbekir b. el-Hâc Mehmed, Salıcı Molla Osman b. Mustafa, Ekmekçiler Kethudâsı Ali Ağa b. Abdurrahman, Molla Mustafa b. el-Hâc Mehmed, Molla Hasan b. Abdullah, Ahmed Beşe b. Mehmed.