İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 186 Hüküm no: 147 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Ahmed Ağa’nın Hasköy ve Sütlüce’deki dört fırın ile üç değirmendeki gedik hisselerini sattığı Habbâz tâifesinden Ahmed Ağa b. Hasan nâm kimesne meclis-i şer‘-i şerîf-i enverde yine tâife-i merkūmeden hâmilü’r-rakīm Agop v. Bedros nâm zimmî muvâcehesinde ikrâr-ı tâm ve takrîr-i kelâm edip Havâss-ı refi‘a kazâsına tâbi‘ Hasköy’de vâki‘ Pîrî Paşa Fırını ve Orta Fırın ve İskele Fırını ve fırın-ı mezkûrlara merbût on yedi horos ve Sığyer ta‘bîr olunur beş horos uncu değirmeninde mevcûd cem‘an yirmi iki horos değirmenlerde gedik ta‘bîr olunur seksen sekiz re’s bargir ve sâir âlât-ı lâzıme-i ma‘lûme yirmi dört sehim i‘tibârıyla bir sehim üç re’s bargir ve üç hisse-i şâyi‘ası akd-i [âti’z-]zikrin sudûruna değin yedimde mülk ve hakkım olup ve yine Sütlüce’de vâki‘ bir bâb fırın ve ittisâlinde olan altı horos değirmen derûnunda mevcûd gedik ta‘bîr olunur yirmi dört re’s bargir ve sâir âlât-ı lâzıme-i ma‘lûme on iki sehim i‘tibârıyla bir sehim iki re’s bargir yedimde mülküm olmağla hâlâ ben mârrü’z-zikr Hasköy’de vâki‘ fırın ve değirmende i‘tibâr-ı mezkûr üzere olan bir sehim üç re’s bargir ve üç ayağ hisse-i şâyi‘amı dört yüz guruşa ve zikrolunan Sütlüce’de vâki‘ fırın ve değirmende i‘tibâr-ı mezkûr üzere olan bir sehim iki bargir hisse-i şâyi‘amı iki yüz guruş ki cem‘an altı yüz guruşa tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile merkūm Agop’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mecmû‘-ı mezkûr altı yüz [51a] guruşu merkūm Agop yedinden tamamen ahz u kabz eyleyip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr Hasköy’de vâki‘ fırın ve değirmenlerde i‘tibâr-ı mezkûr üzere olan bir sehim üç re’s bargir ve üç ayağ ve Sütlüce’de vâki‘ fırın ve değirmende i‘tibâr-ı mezkûr bir sehim iki bargir hisse-i şâyi‘asını merkūm Agop’un mülk-i müşterâsı ve hakk-ı sırfı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharrem sene 1185. Şuhûdu’l-hâl: Molla Mustafa b. el-Hâc Mehmed, es-Seyyid el-Hâc Ebûbekir Ağa b. el-Hâc Mehmed, Salıcı Molla Osman b. Mustafa, Ekmekçiler Kethudâsı Ali Ağa b. Abdurrahman.