İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 187 Hüküm no: 148 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Asvador’un Murad Paşa Fırını ve değirmendeki gedik hisselerini sattığı Habbâz tâifesinden olup husûs-ı âti’z-zikre kendi tarafından asîl ve karındaşı Agop v. Parnak v. Markos nâm zimmî tarafından vekîl olduğu Filyos v. Avanis ve Markos v. Samuyel nâm zimmîler şehâdetleriyle sâbit olan Asvador v. Parnak nâm zimmî meclis-i şer‘-i şerîf-i enverde yine tâife-i mezbûr eden işbu âmilü’r-rakīm diğer Agop v. Arakil ve Kirkor v. Bedros ve Kigork v. Gaspar nâm zimmîler muvâcehelerinde bi’l-asâle ve bi’l-vekâle ikrâr ve takrîr-i kelâm edip mahmiye-i İslambol’da Ziveroğlu demekle ma‘rûf nâm mahâlde vâki‘ Murad Paşa Fırını ve ittisâlinde vâki‘ yedi horos değirmeni derûnunda mevcûd gedik ta‘bîr olunur yirmi dokuz re’s bargir ve sâir âlât-ı lâzıme-i ma‘lûme on iki sehim i‘tibârıyla iki sehim Haçuk nâm zimmînin ve dört sehmi müvekkilim karındaşım merkūm Agop’un akd-i âti’z-zikrin sudûruna değin yedimizde şâyi‘an mülkümüz olmağla hâlâ ben dört sehim hisse-i şâyi‘amdan üç sehim hisse-i şâyi‘amı asâleten bin dört yüz elli guruşa ve müvekkilim merkūm Agop’un altı sehim hisse-i şâyi‘asını vekâleten iki bin dokuz yüz guruş ki cem‘an dört bin üç yüz elli guruşa tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mesfûrûn diğer Agop ve Kirkor ve Kigork zimmîlere ale’l-iştirâki’s-seviy bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan cem‘an dört bin üç yüz elli guruşu mesfûrdan tamamen bana def‘ ve teslîm ben dahi bi’l-asâle ve bi’l-vekâle ahz u kabz edip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz bi’l-asâle ve bi’l-vekâle âharın zimmetini ibrâ ve ıskāt eyleyip ve herbirimiz ber-vech-i muharrer âharın ibrâsını kabûl eyledikde fîmâ-ba‘d mârrü’z-zikr fırın ve değirmende gedik ta‘bîr olunur yirmi dokuz re’s bargir ve sâir âlât-ı lâzıme-i ma‘lûmede olan on iki sehim i‘tibârıyla benim dört sehim hisse-i şâyi‘amdan üç sehim hisse-i şâyi‘amı ve müvekkilim karınndaşım merkūm Agop’un altı sehim hissesi mesfûrûn diğer Agop ve Kirkor ve Kigork’un ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Muharrem sene 1185. Şuhûdu’l-hâl: Ekmekçiler Kethudâsı Ali Ağa b. Abdurrahman, Salıcı Molla Osman b. Mustafa, es-Seyyid el-Hâc Ebûbekir Ağa b. el-Hâc Mehmed, Molla Mustafa b. el-Hâc Mehmed.