İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 207 Hüküm no: 163 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Başorducu İbrahim ve ortaklarının yeni haffâflar esnafından ihracı gereken sekiz hayme için beş yüz kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ haffâfân-ı cedîd esnâfı üzerlerine ihrâcı lâzım olan sekiz hayme ile ordu ihrâcı’çün taraflarından orducu nasb ü ta‘yîn eyledikleri Başorducu Kethudâ-yı sâbık es-Seyyid İbrahim Çelebi b. es-Seyyid Süleyman ve şerîki Mustafa b. Ahmed ile Hasan b. Abdullah ve Halil b. Abdullah ve İbrahim b. Ali ve Ahmed b. Mehmed ve Karaman Arastası’ndan Süleyman nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı el-Hâc Seyfullah b. Ali ve Dikicibaşı es-Seyyid el-Hâc Ahmed b. Mehmed ve Tâcirler Kethudâsı el-Hâc Mehmed Ağa b. el-Hâc Abdülvehhab ve Dikiciler Kethudâsı es-Seyyid el-Hâc Ahmed Ağa b. İbrahim ve Baltacızâde Ahmed Çelebi b. Hasan ve el-Hâc Mustafa b. Hasan ve Hasan Çelebi b. Mustafa ve Veliyüddin b. Ali ve el-Hâc İsmail b. el-Hâc Hüseyin ve İbrahim Çelebi b. İbrahim ve el-Hâc Hasan b. Abdullah ve Du‘âcı es-Seyyid Hasan b. Abdullah ve Hâfız Mehmed b. Ahmed ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine işbu sene-i mübârekede ihrâcı lâzım olan sekiz hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri altmış ikişer buçuk guruşdan sekiz hayme için cem‘an beş yüz guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrûn-ı mezbûrûnu tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a [gelip] alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 13 min-Zilka‘de sene 1184. Şuhûdu’l-hâl: Şâhidûnü’s-sâbıkūn.