İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 212 Hüküm no: 169 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Mehmed Necib ve Osman Çelebi’nin bezzâzlar esnafından ihracı gereken dört hayme için sekiz yüz kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ bezzâzân esnâfı üzerlerine ihrâcı lâzım olan dört hayme ile ordu ihrâcı’çün taraflarından orducu nasb ü ta‘yîn eyledikleri Mehmed Necib b. Mehmed ve Osman Çelebi b. Ali nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı İsmail Ağa b. el-Hâc Ahmed ve Yiğitbaşı Mehmed Çelebi b. Ahmed ve ustalarından el-Hâc Mustafa b. Hasan ve el-Hâc Ahmed b. Musa ve Ahmed Çelebi b. Hasan ve diğer el-Hâc Mustafa b. Ahmed ve es-Seyyid Abdullah b. es-Seyyid el-Hâc Abdullah ve Mustafa b. el-Hâc Ali ve es-Seyyid el-Hâc Mehmed b. Mustafa ve el-Hâc İsmail b. Mustafa ve el-Hâc Mahmud b. Yakub ve es-Seyyid el-Hâc Mustafa b. es-Seyyid Mehmed ve Aşcızâde Ahmed Ağa ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine [işbu] sene-i mübârekede ihrâcı lâzım olan dört hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri ikişer yüz guruşdan dört hayme için cem‘an sekiz yüz guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrân-ı mezbûrânı tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 3 min-Zilka‘de sene 1184. Şuhûdu’l-hâl: Şâhidûnü’s-sâbıkūn.