İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 213 Hüküm no: 170 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Halil, Ebûbekir, Mehmed ve Ali’nin nalbant esnafından ihracı gereken dört hayme için dört yüz kırk kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ na‘lbend esnâfı üzerlerine ihrâcı lâzım olan dört hayme ile ordu ihrâcı’çün taraflarından orducu nasb ü ta‘yîn eyledikleri es-Seyyid Halil b. es-Seyyid Mustafa ve Ebûbekir b. Abdullah ve Mehmed Beşe b. İbrahim ve es-Seyyid Ali b. Süleyman nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı el-Hâc Halil b. Ali ve Mütevellî el-Hâc İbrahim b. Mustafa ve Yiğitbaşı Molla Mustafa b. Mehmed ve Bahçekapılı İbrahim Usta ve Parmakkapılı Ali Usta ve Uzun Mehmed ve Beşir Usta ve sâirleri mahzarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine [işbu] sene-i mübârekede ihrâcı lâzım olan dört hayme ile ordu ihrâcı’çün taraflarından bizi orducu nasb ü ta‘yîn eyledikleri[nde] bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri yüz onar guruşdan dört hayme için cem‘an dört yüz kırk guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrân-ı mezbûrânı tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 17 min-Zilka‘deti’ş-şerîfe sene 1184. Şuhûdu’l-hâl: Şâhidûnü’s-sâbıkūn.