İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 217 Hüküm no: 174 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Başorducu Halil, Süleyman, Feyzullah ve Ahmed’in berberler esnafından ihracı gereken altı hayme için dört yüz seksen kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için mahmiye-i İstanbul esnâfının mükemmel ve müretteb ordu ihrâcı bâbında Ordu-yı Hümâyûn ağası ta‘yîn olunan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olan imtisâlen-leh mahmiye-i mezbûrede vâki‘ berberler esnâfı üzerine ihrâcı lâzım olan altı hayme ile ordu ihrâcı’çün taraflarından orducu nasb ü ta‘yîn eyledikleri Başorducu el-Hâc Halil bin Hüseyin ve Süleyman b. el-Hâc Mehmed ve Feyzullah b. Ali ve Ahmed b. Abdullah nâm kimesneler Ordu-yı Hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı el-Hâc Halil b. Mehmed ve şeyhleri [59a] ve Yakub Çelebi b. Ali ve el-Hâc Mehmed b. Ahmed ve Yiğitbaşı İbrahim b. Mehmed ve Çavuş Molla Hayrullah b. İbrahim ve sâirleri mahzarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan altı hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri seksener guruşdan altı hayme için cem‘an dört yüz seksen guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mezbûr-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrûn-ı mezbûrûnu tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i merkūm mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fi’l-yevmi’l-hâdî aşer min-Zilka‘de sene 1184. Şuhûdu’l-hâl: Şâhidûnü’s-sâbıkūn.