İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 220 Hüküm no: 177 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Mehmed Ağa’nın çadırcı esnafından ihracı gereken bir hayme için yüz otuz kuruş tahsil ettiği <<İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından>> İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ çadırcı esnâfı üzerlerine ihrâcı lâzım olan bir hayme ile ordu ihrâcı için taraflarından orducu nasb ü ta‘yîn eyledikleri Mehmed Ağa b. Ali nâm kimesne Ordu-yı Hümâyûn ihrâcı için kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i enverde esnâf-ı mezbûre kethudâsı Mustafa Çelebi b. Mustafa ve Yigitbaşı el-Hâc Mustafa b. Yusuf ve Hâssa Çadırcıbaşısı Ali Ağa b. Abdullah ve Kâtib Hüseyin Efendi b. İbrahim ve Çadırcıbaşı Süleyman Çelebi b. Ahmed ve el-Hâc Osman b. Mehmed ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan bir hayme ile ordu ihrâcı için taraflarından beni orducu nasb ü ta‘yîn eylediklerinde ben dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimden sonra mu‘tâd-ı kadîm üzere zikrolunan bir hayme için veregeldikleri yüz otuz guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledim fîmâ-ba‘d meblağ-ı mezkûrdan merkūmûn yedlerinde bir akçe ve bir habbe bâkī kalmamışdır dedikde kethudâ-yı mezbûr ve bâlâda isimleri mezkûr [ve] mastûr esnâf-ı mezbûre ihtiyârları merkūmûn dahi mukırr-ı mezbûru tasdîk ve tahkīk ve mezbûrun hizmet-i mezkûreyi kemâ-yenbagī idâre ve rü’yetine ta‘ahhüdü ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fi’l-yevmi’t-tâsi‘ min-Zilka‘de li-sene erba‘a ve semânîn ve mie ve elf. Şuhûdu’l-hâl: Muhzır Akşehirli Osman, Muhzır Çaşnigirli Mehmed Çelebi b. İbrahim, Muhzır Molla Mustafa b. Ahmed, Muhzır el-Hâc Mustafa b. Hasan, Muhzır İbrahim b. el-Hâc Mustafa.