İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 221 Hüküm no: 178 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Mustafa ve oğlu Hüseyin’in kazancılar esnafından ihracı gereken bir hayme için iki yüz elli kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ kazgancıyân esnâfı üzerlerine ihrâcı lâzım olan bir hayme ile ordu ihrâcı’çün taraflarından orducu nasb ü ta‘yîn eyledikleri Mustafa b. Mehmed ve Hüseyin b. el-mezbûr Mustafa nâm kimesneler ordu-yı hümâyûn ihrâcı için kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı Alemdâr Hasan b. Hüseyin ve Mehmed Usta b. Abdullah ve diğer Mehmed Usta ve Hasan Usta b. Ahmed ve Ahî Mehmed b. Ahmed ve yiğitbaşı Yahya b. Mustafa ve es-Seyyid Mehmed b. Osman ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan bir hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere zikrolunan bir hayme için veregeldikleri iki yüz elli guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrân-ı mezbûrânı tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fi’l-yevmi’l-hâdî aşer min-Zilka‘de sene 1184 Şuhûdu’l-hâl: Şâhidûnü’s-sâbıkūn.