İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 225 Hüküm no: 183 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Musa Çelebi, Osman Usta ve Seyyid Mehmed’in kılıççı esnafından ihracı gereken iki hayme için on sekiz bin akçe tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ kılıçcı esnâfı üzerlerine ihrâcı lâzım olan iki hayme ile ordu ihrâcı’çün taraflarından orducu nasb ü ta‘yîn eyledikleri Musa Çelebi b. Mehmed ve Osman Usta b. Mehmed ve es-Seyyid Mehmed b. Ebûbekir nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı Mehmed Ağa b. Şaban ve Kılıçcıbaşı el-Hâc Mehmed Ağa b. el-Hâc İbrahim ve Yiğitbaşı Ahmed b. İbrahim ve Osman b. İshak ve Hüseyin b. Osman ve Hasan Usta b. İbrahim ve el-Hâc Mehmed b. Abdullah ve Molla Ahmed ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan iki hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri dokuz bin akçeden iki hayme için cem‘an on sekiz bin akçeyi kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde [61a] bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrûn-ı mezbûrûnu tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fî 10 Zilka‘de sene 1184 Şuhûdu’l-hâl: Şâhidûnü’s-sâbıkūn.