İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 226 Hüküm no: 184 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Mehmed Beşe ve Abdullah’ın terziler esnafından ihracı gereken üç hayme için dört yüz kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İstanbul esnâfının mükemmel ve müretteb ordu ihrâcı -için- bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ hayyâtân esnâfı üzerlerine ihrâcı lâzım olan üç hayme ile ordu ihrâcı’çün taraflarından orducu nasb ü ta‘yîn eyledikleri Vefalı Mehmed Beşe b. Ahmed ve Mahmudpaşa[lı] es-Seyyid el-Hâc Abdullah b. es-Seyyid Mustafa nâm kimesneler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûre kethudâsı Mehmed Ağa b. İsmail ve Yiğitbaşı Mustafa b. Hüseyin ve İsmail Usta b. Mehmed ve Karaman Yiğitbaşısı Mehmed b. Ahmed ve Halil Usta b. Ahmed ve Hasan b. Süleyman ve Mehmed Usta b. Hasan ve es-Seyyid Osman b. Hüseyin ve diğer Halil b. İbrahim ve âhar Halil b. İbrahim ve Osman Usta b. Ömer ve diğer Hasan Usta b. Ali ve es-Seyyid Abdurrahman b. Ömer ve Mehmed Usta b. Abdullah ve diğer Mehmed b. Ali ve Zeynelabidin b. Abdullah ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan üç hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri yüz otuz üç guruş kırk akçeden üç hayme için cem‘an dört yüz guruşu kethudâ ve yiğitbaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde kethudâ-yı mezbûr ve bâlâda isimleri mastûr esnâf-ı mezbûre ihtiyârları merkūmûn dahi mukırrûn-ı mezbûrûnu tasdîk ve tahkīk ve mezbûrların hizmet-i mezkûreleri kemâ-yenbagī idâre ve rü’yetlerine ta‘ahhüd ve tekeffül eylediklerini kâtib-i mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fi’l-yevmi’l-âşir min-Zilka‘deti’ş-şerîfe li-sene erba‘a ve semânîn ve mie ve elf. Şuhûdu’l-hâl: Şâhidûnü’s-sâbıkūn.