İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 227 Hüküm no: 185 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu tayin olunan Yasef ve David ve İsa’ın çakşırcılar esnafından ihracı gereken üç hayme için dört yüz elli kuruş tahsil ettikleri İşbu sâl-i meymenet-iştimâlde vâki‘ sefer-i hümâyûn-ı nusret-makrûn için İslambol esnâfının mükemmel ve müretteb ordu ihrâcı için bâbında ordu-yı hümâyûn ağası ta‘yîn buyrulan Dergâh-ı âlî kapıcıları zâbitânından İsmail Ağa b. Yusuf yediyle fermân-ı âlî sâdır olmağın imtisâlen-leh mahmiye-i mezbûrede vâki‘ çakşırcıyân esnâfı üzerlerine ihrâcı lâzım olan üç hayme ile ordu ihrâcı’çün taraflarından orducu nasb ü ta‘yîn eyledikleri Yasef v. Mosi ve David v. İsak ve İsak v. David nâm Yahûdiler ordu-yı hümâyûn ihrâcı’çün kıbel-i şer‘den irsâl olunan Ali Efendi’nin Mahmud Paşa Câmi‘-i şerîfi türbe kapısı hâricinde akdeylediği meclis-i şer‘-i şerîf-i enverde esnâf-ı mezbûrenin Rum ustabaşılarından Yorgi v. Kostantin ve Yahûdî ustabaşıları Yuda v. Menahim ve Ermeni ustabaşılarından Nörsis v. Sahak ve hirfet-i mezbûreden Yorgi v. İstati ve Andon v. Melkon ve sâirleri mahzarlarında ikrâr-ı tâm ve takrîr-i kelâm edip ber-mûceb-i emr-i âlî ve defter-i mevkūfât-ı hakānî esnâf-ı mezbûre üzerlerine sene-i mübârekede ihrâcı lâzım olan üç hayme ile ordu ihrâcı’çün taraflarından bizi orducu nasb ü ta‘yîn eylediklerinde bizler dahi ber-minvâl-i muharrer orduculuğu kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğimizden sonra mu‘tâd-ı kadîm üzere beher hayme için veregeldikleri yüz ellişer guruşdan üç hayme için cem‘an dört yüz elli guruşu ustabaşıları ve sâirleri yedlerinden tamamen ve kâmilen ahz u kabz eyledik fîmâ-ba‘d meblağ-ı mecmû‘-ı mezkûrdan merkūmûn yedlerinde bir akçe ve bir habbe bâkī kalmamışdır dediklerinde ustabaşıları ve bâlâda isimleri mastûr esnâf-ı mezbûre ihtiyârları merkūmûn dahi mukırrûn-ı mezbûrûnu tasdîk ve tahkīk ve mezbûrların hizmet-i mezkûreyi kemâ-yenbagī idâre ve rü’yetlerine Yeni Han’da mütemekkin Sarrâfoğlu Hayim v. Aron ta‘ahhüd ve tekeffül ve mesfûr dahi esnâf-ı mezbûra tekeffül eylediklerini kâtib-i merkūm mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fî 9 min-Zilka‘de 1184. Şuhûdu’l-hâl: Şâhidûnü’s-sâbıkūn.