İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 230 Hüküm no: 189 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Düğmeci esnafının talebi üzerine Abdüllatif Usta’nın kethudâ tayin olunduğu Âsitâne-i aliyye’de düğmeci esnâfından Yiğitbaşı Hüseyin Usta b. Mustafa ve İbrahim Usta b. Yusuf ve Halil Usta b. Süleyman ve Mehmed Usta b. Mustafa ve el-Hâc Hüseyin Usta b. Ali ve Mustafa b. Mehmed ve el-Hâc Ahmed Usta b. Receb ve İbrahim Usta b. Süleyman nâm kimesneler ile zimmî ustalarından Arakil v. Aleksan ve Zakar v. Kılıç ve Karabet v. Vartan ve Serkiz v. Yamandi ve Haçador v. Serkiz ve Avanis v. İsayi ve Takor v. Avanis ve sâirleri meclis-i şer‘-i şerîf-i enverde yine esnâf-ı mezbûreden işbu râfi‘u’l-kitâb Abdüllatif Usta b. Mehmed nâm kimesne mahzarında herbiri takrîr-i kelâm ve ta‘bîr ani’l-merâm edip kethudâmız olan Mehmed Usta b. el-Hâc Mustafa vefât etmekle kethudâlık hizmeti mu‘attala kalıp ve kethudâya ihtiyâcımız olup ve mezbûr Abdüllatif Usta pîr-perver ve cümlemizin muhtârı ve kethudâlık umûrunu her vechile idâreye kādir olmağla üzerimize kıbel-i şer‘-i enverden kethudâ nasb ü ta‘yîn olunmak matlûbumuzdur deyü iltimâs etmeleriyle a‘lâ-yı kitâbı tevkī‘-i müstetâbı ile tezyîn buyuran hâkim-i hâsim efendi hazretleri mezbûr Abdüllatif Usta’yı esnâf-ı mezbûrenin taleb ve iltimâslarıyla kethudâ nasb ü ta‘yîn ve umûr-ı mu‘tâdelerini alâ-vechi’l-istikāme rü’yet etmek üzere tenbîh buyurduklarında ol dahi kabûl ve hilâf-i şer‘-i mutahhar hareket etmeyip kadîmî üzere umûrlarını rü’yet ve idâreye müte‘ahhid olmağın mâ vaka‘a bi’t-taleb ketb olundu. Fî 17 Safer sene [1]185. Şuhûdu’l-hâl: Kethudâ-yı muhzırân Mehmed Ağa b. Ahmed, İsmail Çelebi b. Ali, Ali Çelebi b. Abdullah, Osman Çelebi b. Halil.