İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 231 Hüküm no: 190 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Kemâleddin ve kardeşinin bir fırın ve değirmendeki gedik hisselerini sattıkları Habbâz tâifesinden olup husûs-ı âti’z-zikrde kendi tarafından asîl ve karındaşı Yahya b. el-Hâc Mehmed b. Kemâleddin tarafından Receb Beşe b. Osman ve Ali Beşe b. Hasan nâm kimesneler şehâdetleriyle sâbitü’l-vekâle vekîl olan Kemâleddin b. el-mezbûr el-Hâc Mehmed meclis-i şer‘-i şerîf-i enverde işbu hâmilü’r-rakīm Mıgırdıç v. Serkis nâm zimmî muvâcehesinde bi’l-asâle ve bi’l-vekâle ikrâr ve takrîr-i kelâm edip mahrûse-i Galata’da Balıkpazarı Kapısı dâhilinde Kürkcülerbaşı nâm mahâlde vâki‘ bir bâb habbâz fırını ve ona merbût Galata muzâfâtından kasaba-i Kasımpaşa’da Dörtkuyular nâm mahâlde vâki‘ dört horoz değirmen derûnunda mevcûd gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla sekiz sehmi benim ve sekiz sehmi karındaşım müvekkilim mezbûr Yahya’nın şâyi‘an yedimizde mülkümüz olmağla hâlâ ben mârrü’z-zikr sekiz sehimden iki sehim hisse-i şâyi‘amı bi’l-asâle ve karındaşım mezbûr Yahya’nın sekiz sehimden kezâlik iki sehim hissesini bi’l-vekâle tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile altı yüz elli guruşa merkūm Mıgırdıç’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr altı yüz elli guruşu merkūm Mıgırdıç yedinden tamamen ahz u kabz edip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimiz âharın zimmetini bi’l-asâle ve bi’l-vekâle ibrâ ve ıskāt ve herbirimiz ber-vech-i muharrer âharın ibrâsını kabûl edip fîmâ-ba‘d mârrü’z-zikr fırın ve değirmende gedik ta‘bîr olunur on altı re’s bargir ve sâir âlât-ı lâzıme-i ma‘lûme on altı sehim i‘tibârıyla benim sekiz sehimden iki sehim hisse-i şâyi‘am ve karındaşım müvekkil-i mezbûr Yahya sekiz sehimden kezâlik iki sehim hisse-i şâyi‘ası merkūm Mıgırdıç’ın mülk-i müşterâsı ve hakkı olup bizim ikişer sehimden cem‘an dört sehimde alâka ve medhalimiz kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Saferü’l-hayr li-sene hamse ve semâmîn ve miete ve elf. Şuhûdu’l-hâl: İbrahim b. Mehmed, Molla Hasan b. Abdullah, Ali Beşe b. İbrahim, Molla Mustafa b. el-Hâc Mehmed, Ekmekci Kethudâsı Ali Ağa b. Abdurrahman, Ahmed Ağa b. Hasan, es-Seyyid el-Hâc Ebûbekir b. el-Hâc Mehmed, İbrahim Beşe b. Bayram