İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 239 Hüküm no: 197 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Paşa oğlu Süleyman’ın tasarrufunda bulunan menzilin mülk ve vakıf olan kısımlarının ifraz olunarak mülk olan kısmının vârislerine, vakıf olan kısmının ise ait olduğu vakıflara teslimi İhrâc şüde, fî 14 N [Ramazan] sene 1258 Husûs-ı âti’l-beyânın mahâllinde ketb ü tahrîri için sâdır olan fermân-ı âlîlerine imtisâlen cânib-i şer‘-i enverden irsâl olunan Ali Efendi ve Haremeynü’ş-şerîfeyn müfettişi müderrisîn-i kirâmdan Ahmed Necib Efendi tarafından mürsel Abdullah Efendi ve nezâret-i şeyhu’l-İslâmîde olan evkāf müfettişi müderrisîn-i kirâmdan Ömer Efendi tarafından mürsel Hayrullah Efendi ve hâssa mi‘mârlarından İsmail ve Ebûbekir ile İstanbul’da Peykhâne kurbünde Uzun Şücâ‘ mahallesinde vâki‘ bir tarafdan Şerif Paşa veresesi menzili ve bir tarafdan ba‘zen Haremeyn Vakfı’ndan bahçe ve ba‘zen Muhyiddin Vakfı’ndan mezbûr Şerif Paşa veresesi menzili ve bir tarafdan Ali Paşa Vakfı’ndan Arab Odaları ve Gömleksiz Odaları demekle ma‘rûf menâzil ve bir tarafdan tarîk-i âm ile mahdûd Firârî Mustafa Paşa demekle ma‘rûf [kimesneye âid] bir bâb menzil-i kebîre varıp huzûr-ı Müslimînde bi’d-defa‘ât akd-i meclis-i şer‘-i kavîm etdiklerinde menzil-i mezkûrede mülk ve evkāfa mutasarrıf iken bundan akdem vefât eden Süleyman b. el-mezbûr Mustafa Paşa b. Ömer b. Ali’nin verâseti vâlidesi Hadîce Hatun bt. Abdullah ile li-üm er karındaşı Yahya nâm sagīr ve li-ebeveyn ammisi Hüseyin Bey b. el-mezbûr Ömer’e münhasıra oldukdan sonra menzil-i mezbûra vâzı‘atü’l-yed olan mezbûre Hadîce Hatun ile kendi asâleten ve sagīr-i mezbûrun babası velîsi mezbûr Hüseyin Bey bi’l-asâle ve bi’l-velâye meclis-i ma‘kūd-ı mezkûrda nezâret-i dâ‘îlerinde olan evkāfdan zikrolunan Uzun Şücâ‘ mahallesinde imâm olanlara meşrûta Dilber Hatun Vakfı’nın ber-vech-i meşrûta mütevellîsi bâ‘is-i kitâb İmâm eş-Şeyh es-Seyyid Mustafa Efendi b. el-Hâc Ahmed ve yine mahalle-i mezbûrede müezzin olanlara meşrûta Dilber Hatun Vakfı’ndan galle ve tasarrufu meşrûta olmağla hâlâ Müezzin Molla Hasan b. Habib ve Fâtih-i Mısır Sinan Paşa Vakfı mülhakātından Dericiler? Bölükbaşısı Hasan Bey Vakfı’nın mütevellîsi Mehmed Emin Ağa b. İsmail tarafından vekîl-i müsecceli el-Hâc Mehmed b. Ebûbekir ve yine nezâret-i şeyhülislâmîde olan Fâtih-i Yemen Gāzi Sinan Paşa Vakfı’nın mütevellîsi Ahmed Ağa ve Haremeyn nezâretinde olan Ali Paşa-i atîk Vakfı’nın mütevellîsi Mustafa Ağa b. Abdullah mahzarlarında ikrâr-ı tâm ve takrîr-i kelâm edip ber-mantûk-ı hücec-i şer‘iye menzil-i mezkûrun mülk olan mahallî [65a] verese-i merkūmûna mevrûs olup ve ber-mûceb-i temessükât menzil-i mezbûrun evkāf-ı mezkûrândan olan mahalleri müteveffâ-yı mezbûr Süleyman Bey[‘in] bâ-icâreteyn taht-ı tasarrufunda iken bilâ-veled fevt oldukda mahlûlünden cânib-i evkāf-ı mezkûrâna âid ve râci‘ olmağla işbu temessükât mantûklarınca hudûd [ve] sınır ve zirâ‘ları ifrâz ve ta‘yîn ve tahsîs olunmak cânib-i evkāf ve verese-i merkūmûn haklarında enfa‘ ve evlâ olduğu hâzırûn-ı merkūmûn ve mi‘mârân-ı mezbûrân ihbârlarıyla lede’ş-şer‘i’l-enver zâhir ve mütehakkık oldukdan sonra ber-mûceb-i temessük mezbûr Uzun Şücâ‘ Vakfı’ndan olup bir tarafdan Ali Paşa-yı atîk Vakfı’ndan bahçe arsası ve bir tarafdan ba‘zen tarîk-i âm ve ba‘zen Ali Paşa Vakfı’ndan menzil ve bir tarafdan Ali Paşa-yı atîk Vakfı’ndan Boyacılar Kethudâsı Hasan Ağa menzili ve ba‘zen merkūm Hüseyin Bey Vakfı’ndan köşk mahallî ve bir tarafdan Fâtih-i Yemen Gāzi Sinan Paşa Vakfı’ndan bahçe arsası ile mahdûd zikrolunan köşkün arsa iki buçuk zirâ‘ ebniyesini ve bir tarafdan taş duvar ve eşcâr-ı müsmire ve gayr-ı müsmire ve bi’r-i mâ ve enkāz-ı sâire-i ma‘lûmesini hâvî mi‘mârân-ı mezbûrân mesâhaları üzere terbî‘an dört yüz elli zirâ‘ beher şehr seksen beş akçe icâre-i müeccele mahâllini vakf-ı mezbûrun mütevellîsi mezbûr eş-Şeyh es-Seyyid Mustafa Efendi bi’t-tevliye kabz ve kabûl edip ve ber-mûceb-i temessük mezbûr Hasan Bey Vakfı’ndan olup hizâsında vâki‘ bir tarafdan Haremeyn Vakfı’ndan iki bâb menzil ve ba‘zen Muhyiddin Vakfı’ndan bir bâb menzil ve bir tarafdan erba‘a-i ihmâsı müezzin meşrûtası ve humsu Fâtih-i Yemen Vakfı’ndan taş odaları ve Fâtih-i Yemen Sinan Paşa Vakfı’ndan bahçe arsası ve bir tarafdan mezkûrun köşk tûlen sekiz buçuk zirâ‘dan mâ‘adâ Dilber Hatun Vakfı’ndan imâm olanlara meşrûta bahçe arsası ve bir tarafdan Ali Paşa Vakfı’ndan iki bâb menziller ile mahdûd bir köşk ve tahtında zîr-i zemîn mahzeni müştemil terbî‘an iki yüz kırk zirâ‘ mahâllini vakf-ı mezbûrun mütevellîsi vekîli mezbûr el-Hâc Mehmed Ağa kabûl ve yine mezbûr Dilber Hatun Vakfı’ndan olup tahdîd ve tavsîfden müstağnî terbî‘an yüz zirâ‘ arsa üzerine süflâ hums mertebesinden mâ‘adâ olan seksen zirâ‘ arsası olan taş odayı müezzin-i merkūm Molla Hasan kabûl ve verâsında Fâtih-i Yemen Gāzi Sinan Paşa Vakfı’ndan olup bir tarafdan mârrü’z-zikr taş oda ve bir tarafdan sâlifü’l-beyân Şerif Paşa veresesi taraflarında olan menzil ve bir tarafdan verese-i merkūmûnun mülk bahçeleri ve bir tarafdan ba‘zen mezbûr Dilber Hatun Vakfı’ndan arsa ve ba‘zen merhûm Hüseyin Bey Vakfı’ndan arsa ile mahdûd ve zât-ı eşcâr-ı müsmire ve mezbûr taş odanın sakfını hâvî terbî‘an on üç zirâ‘ mahâllini vakf-ı mezbûrun mütevellîsi mezbûr Ahmed Ağa kabûl ve Haremeyn nezâretinde Ali Paşa-yı atîk Vakfı’ndan olup bir tarafdan Firârî Mustafa Paşa veresesi mülk bahçesi ve arsası ve bir tarafdan Sinan Paşa ve ba‘zen Dilber Hatun vakıflarından arsalar ve bir tarafdan mezbûr Ali Paşa Vakfı’ndan ba‘zen Hadîce ve Sâfiye hatunlar ve ba‘zen Arab Mehmed zevcesi Zeyneb Hatun ve ba‘zen Berber Süleyman ve ba‘zen İbrahim Bey tasarrufunda olan menâzil ve bir tarafdan tarîk-i âm ile mahdûd beher şehr yüz yetmiş beş akçe icâre-i müecceleli ebniye ile meşgūl olan terbî‘an iki bin dört yüz otuz bir zirâ‘ arsayı mezbûr Ali Paşa-yı atîk Vakfı’nın mütevellîsi Mustafa Ağa kabz ve kabûl mâ‘adâ mülk olan iki bin üç yüz yetmiş altı zirâ‘ zât-ı eşcâr-ı müsmire ve gayr-ı müsmire ve kârgir bir matbahı müştemil mahâllini bizler ber-minvâl-i muharrer herbirimiz kabz ve kabûl eyledik dediklerinde evkāf-ı mezbûrânın mütevellîleri mezbûrûn herbiri dahi âharı tasâduk eylediklerini mûmâ-ileyhim mahâllinde ketb ü tahrîr ve ba‘dehû ma‘an meb‘ûs ümenâ-i şer‘ ile meclis-i şer‘a gelip [65b] herbiri alâ-vukū‘ihî inhâ ve takrîr etmeğin mâ vaka‘a bi’t-taleb ketb olundu Fi’l-yevmi’s-sâbi‘ ve’l-işrîn min-Saferü’l-hayr li-sene hamse ve semânîn ve mie elf. Şuhûdu’l-hâl: Mehmed b. Ahmed, Ali Efendi b. Abdullah, el-Hâc Mustafa b. el-Hâc Ali, İbrahim Efendi b. ( ), Mehmed Efendi b. İsmail, İbrahim Ağa b. Hüseyin, Ali Ağa b. Yusuf, Mustafa Efendi b. Abdullah, Hüseyin Ağa b. Abdullah, Dizdâriye Ağası Abdullah Efendi b. Abdülkadir ve gayruhum.