İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 238 Hüküm no: 196 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un zifafa girmediği kocasından muhâlaa yoluyla boşandığı Mahmiye-i İslambol’da Fethiye kurbünde Kâtib Muslihiddin mahallesinde sâkine Ümmügülsüm nâm bikr-i bâliğanın babası ve tarafından husûs-ı âti’z-zikrde vekîl olduğu zât-ı mezbûreyi ârifân es-Seyyid Ahmed b. es-Seyyid Mustafa ve İsmail Çelebi b. Mustafa nâm kimesneler şehâdetleriyle sâbit olan Hâfız Mehmed Efendi b. Ahmed nâm kimesne meclis-i şer‘-i şerîf-i enverde zevc-i gayr-ı dâhil-i muhâla‘ı işbu râfi‘u’l-kitâb Ahmed Efendi b. İbrahim nâm kimesne mahzarında bi’l-vekâle ikrâr ve takrîr-i kelâm edip mezbûr Ahmed Efendi kızım müvekkilem mezbûre Ümmügülsüm’ün zevc-i gayr-ı dâhili olup beynleri adem-i tevfîkden nâşî kızım mezbûre Ümmügülsüm hul‘a tâlibe ve râgıbe olmağla zimmetinde mütekarrir ve ma‘kūdün-aleyh olan yüz elli guruş mehr-i müeccelinden lâzım gelen nısfından geçip ve mukaddemâ mu‘accel olmak üzere medfû‘ olan yüz guruşdan beş guruşunu kendiye def‘ ve teslîm eylediği nişân yağlığına mukābil tutup mâ‘adâ doksan beş guruşunu bedel-i hul‘ olmak üzere mezbûr Ahmed Efendi’ye bi’l-vekâle def‘ u teslîm ol dahi ahz u kabz eylediğinden sonra mezbûr Ahmed Efendi ile muhâla‘a-i sahîha-i şer‘iye ile bi’l-vekâle hul‘ olduğumda ol dahi hul‘-ı mezbûru kabûl edip mehr-i mezkûra ve bedel-i sulh-ı mezbûra ve nişân yağlığına ve ibtidâ-i akdden târih-i kitâba gelince bi’l-cümle beynlerinde cereyân eden ahz u i‘tâ ve mu‘âmelât-ı şettâya ve sâire müte‘allika âmme-i da‘vâdan ben mezbûr Ahmed Efendi’nin bi’l-asâle ve bi’l-vekâle zimmetini ibrâ ve ıskāt edip ol dahi meblağ-ı mezkûr yüz guruşa ve sâire müte‘allika âmme-i da‘vâdan benim ve kızım müvekkile-i mezbûrenin zimmetini kezâlik ibrâ ve ıskāt edip ve herbirimiz ber-vech-i muharrer âharın ibrâsını kabûl eyledik eğer ba‘de zamânin kızım mezbûre lâzım gelen nısf mehr-i müeccelini mezbûr Ahmed Efendi’den taleb ve da‘vâ ve nesn ahz eder ise me’hûzuna ben kefîl ve zâminim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu Fi’l-yevmi’l-işrîn min-Saferü’l-hayr li-sene hamse ve semânîn ve mie ve elf. Şuhûdu’l-hâl: İsmail b. Mustafa, es-Seyyid Ahmed b. es-Seyyid Mustafa, Abdullah Efendi b. Ahmed, Muhzır el-Hâc Mustafa, Musa Efendi b. Mehmed, Muhzır Molla İsmail, Hüseyin Efendi b. Mustafa, Ali Çelebi ve gayruhum.