İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 242 Hüküm no: 199 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Ekmekçiler Kethudâsı Abdullah’ın değirmen gediği hissesini sattığı Âsitâne-i aliyye’de sâbıkâ ekmekçiler kethudâsı olan el-Hâc Abdullah b. Mehmed nâm kimesne meclis-i şer‘-i hatîr-i lâzımü’t-tevkīrde uncu tâifesinden işbu hâmilü’r-rakīm Masar v. Karabet nâm zimmî muvâcehesinde ikrâr ve takrîr-i kelâm edip mahrûse-i Galata’da Hacı A‘mâ mahallesinde Yeşildirekli Hamam kurbünde vâki‘ iki horos uncu değirmeni derûnunda mevcûd gedik ta‘bîr olunur sekiz re’s bargir ve sâir âlât-ı lâzıme-i ma‘lûme akd-i âti’z-zikr sudûruna değin yedinde mülk ve hakkım olmağla hâlâ ben mârrü’z-zikr gedik ta‘bîr sekiz re’s bargir ve sâir âlât-ı lâzıme-i ma‘lûme sekiz sehim i‘tibârıyla dört sehim hisse-i şâyi‘amı tarafından îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mersûm Masar’a sekiz yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr sekiz yüz guruşu mersûm Masar yedinden tamamen ahz u kabz eyleyip semenine ve bey‘-ı mezkûrun tağrîr ve gabnine ve gedik husûsuna müte‘allika âmme-i da‘vâdan herbirimizin âharın zimmetini ibrâ ve ıskāt ve herbirimiz ber-vech-i muharrer âharın ibrâsını kabûl eyledik fîmâ-ba‘d mârrü’z-zikr gedik ta‘bîr olunur sekiz re’s bargir ve sâir âlât-ı lâzıme-i ma‘lûme sekiz sehim i‘tibârıyla dört sehim hisse-i şâyi‘ası mersûm Masar’ın mülk-i müşterâsı ve hakk-ı sırfı olup dört re’s bargiri ve sâir âlât-ı lâzıme-i ma‘lûmenin dört sehminde ve gediğinde benim kat‘a alâka ve medhalim kalmamışdır dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu Fî 3 Rebî‘ülevvel sene 1185. Şuhûdu’l-hâl: Molla Hasan b. Abdullah, Ahmed Ağa b. Hasan, Molla Mustafa b. el-Hâc Mehmed, Ekmekciler Kethudâsı Ali b. Abdurrahman, Uncular Kethudâsı Mustafa Ağa b. Ahmed, Molla Ali b. Hasan, İbrahim Beşe b. Bayram, Hasan Usta b. Hüseyin, İbrahim b. Mehmed, es-Seyyid el-Hâc Ebûbekir Ağa b. el-Hâc Mehmed, Ali Beşe b. İbrahim.