İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 243 Hüküm no: 200 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Külcü esnafının talebi üzerine kethudâlıklarına Musa b. İsa’nın tayin olunduğu Âsitâne-i aliyye’de vâki‘ esvâk-ı bâzârda arkalarıyla gezdirip ibâdullâha kül bey‘ eden külcü tâifesinin müsinn [ü] ihtiyârlarından es-Seyyid Mustafa b. Abdullah ve Hasan Beşe b. Yusuf ve Yakub b. Hüseyin ve Süleyman b. Mehmed ve es-Seyyid Nebih b. Seyyid Hasan ve Mehmed b. İbrahim ve Yusuf b. İbrahim ve diğer Yusuf b. Ahmed ve Mehmed b. Mustafa ve Himmet b. Ali ve Musa b. Hamza ve Mehmed b. Mustafa ve Nasuh b. Halil ve Ali b. Halil ve Mehmed b. Süleyman ve Mehmed b. Yakub ve Ali b. Abdülkerim ve Hüseyin b. İsmail ve Hüseyin b. Mehmed ve Yusuf b. Eyüb ve es-Seyyid Hüseyin b. Hasan ve Ali b. Mustafa ve Osman b. İsa nâm kimesneler meclis-i şer‘-i şerîf-i enverde yine tâife-i mezbûreden işbu râfi‘u’l-kitâb Musa b. İsa nâm kimesne mahzarında herbiri takrîr-i kelâm edip kethudâmız olan işbu hazır bi’l-meclis Mahmud b. Hasan kethudâlık umûrunu rü’yetde a[c]zi olup keff-i yed etmekle mezbûr Musa’yı cümlemizin muhtârı ve kethudâlık umûrunu her vechile rü’yete kādir olmağla üzerimize kıbel-i şer‘-i enverden kethudâ nasb ü ta‘yîn olunmak matlûbumdur deyü iltimâs etmeleriyle hâlâ a‘lâyı kitâbı tevkī‘-i müstetâbı ile tezyîn buyuran hâkim-i hâsim efendi hazretleri mezbûr Musa’yı tâife-i mezbûrenin taleb [ve] iltimâslarıyla kethudâ nasb ü ta‘yîn ve umûr-ı mu‘tâdelerini alâ-vechi’l-istikāmet rü’yet etmek üzere tenbîh buyurduklarında ol dahi kabûl ve hilâf-ı şer‘-i mutahhar hareket etmeyip kadîmi üzere umûrlarını rü’yet ve idâreye müte‘ahhid olmağın mâ vaka‘a bi’t-taleb ketb olundu. Fî 22 Rebî‘ülevvel sene 1185. Şuhûdu’l-hâl: Ali b. Ahmed, Osman b. Halil, Ali b. Abdullah, İsmail b. Ali, Muhzırân Kethudâsı Mehmed Ağa b. Ahmed ve gayruhum.