|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 116 Hüküm no: 119 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Habib b. Hamza’nın vârislerinden Ayşe’nin bazı eşyalar karşılığında mirastaki haklarından vazgeçtiği
Vilâyet-i Anadolu’da Kastamonu sancağında Hoşalay kazâsına tâbi‘ Karan nâm karye ahâlîsinden olup mahmiye-i İstanbul’da mütemekkin iken bundan akdem vefât eden Habib b. Hamza’nın verâseti sulbî kebîr oğlu Mehmed ve sulbiye kebîre kızları Âişe ve Emine’ye münhasıra olduğu şer‘an zâhir ve müte‘ayyen oldukdan sonra mezbûre Âişe tarafından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında Ebûbekir b. Resül ve Resül b. Yahya şehâdetleri ile şer‘an sâbite olan Mustafa b. Muzaffer mahfil-i kazâda müteveffâ-i mezbûrun muhallefâtına vâzı‘u’l-yed olup işbu bâ‘isü’l-kitâb merkūm Mehmed mahzarında bi’l-vekâle ikrâr ve takrîr-i kelâm edip müvekkile-i mezbûre Âişe müteveffâ-i mezbûrun muhallefâtından isâbet eden hakkı mukābelesinde üç yüz akçe kıymetli bir beyâz bogası ve yüz akçe kıymetli bir kovanı mezbûr Mehmed yedinden tehârüc-i şer‘î tarîki üzere ahz u kabz edip müteveffâ-i mezbûrun muhallefâtına müte‘allika da‘vâ ve mutâlebât ve eymân ve muhâsamâtdan mezbûr Mehmed’i ibrâ ve ıskāt eyledi dedikde gıbbe’t-tasdîk ve’t-taleb mâ-vaka‘a ketb ü sebt olundu.
Tahrîren fi’l-yevmi’s-sâdis min-Zilkadeti’ş-şerife li-sene selâse ve sittin ve elf.
Şuhûdü’l-hâl: el-Hâc Mehmed b. Sefer, Yusuf b. Musa, Ali b. Musa, Rıdvan b. Abdullah ve gayruhum mine’l-huzzâr.
|