.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 116
Hüküm no: 120
Orijinal metin no: [18b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Kurd v. Lamirnos ve kardeşi Dimitri’nin dükkânlarını el-Hâc Himmet’e sattıkları

Medîne-i Üsküdar kazâsına tâbi‘ Kartal nâm karye ahâlîsinden Kurd v. Lamirnos nâm zimmî mahfil-i şer‘-i şerîfde işbu sâhibü’l-kitâb el-Hâc Himmet b. Mehmed nâm kimesne muvâcehesinde ikrâr-ı tâm ve takrîr-i kelâm edip karye-i mersûmede vâki‘ bir tarafdan Kalo Yorgi nâm zimmî mülkü ve bir tarafdan kendi âhar mülküm ve bir tarafdan hisâr duvarı ve bir tarafdan tarîk-i âm ile mahdûd [ve] mümtâz olan dükkânın sülüs-i şâyi‘i benim mülk-i mevrûsum ve sülüsânı li-ebeveyn karındaşım <> Dimitri [çıkma derkenar] nâm zimmînin olmağla mezbûr Dimitri mukaddemâ hisse-i şâyi‘asını mezbûr el-Hâc Himmet’e bey‘ ve teslîm eylemişdi. Hâlâ ben dahi sülüs-i şâyi‘âmı mezbûr el-Hâc Himmet’e beş bin yüz akçeye bey‘ ve teslîm ol dahi iştirâ ve tesellüm eyledikden sonra semeni olan beş bin yüz akçeyi mezbûr el-Hâc Himmet’e deynim olan sekiz bin yüz akçenin beş bin yüz akçesine takās edip ancak mezbûra üç bin akçe deynim kalıp zikr olunan dükkânın cümlesi mezbûr el-Hâc Himmet’in mülk-i müşterâsıdır, keyfe mâ yeşâ’ ve yehtâr mutasarrıf olsun dedikde mâ-vaka‘a kayd şüd.

Fi’t-târîhi’l-mezbûr.

Şuhûdü’l-hâl: Arslan Beşe b. İsmail, el-Hâc Hasan İzzizâde, Hasan Çelebi b. Kaymaz, Mehmed Beşe b. ( ).