İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 300 Hüküm no: 266 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Ali Efendi’nin nafaka ödemesi Mahmiye-i İstanbul’da Karagümrük kurbünde Derviş Ali mahallesinde sâkine ve zâtı zeyl-i vesîkada muharrer[ü’l]-esâmî Müslimîn ta‘rîfleriyle mu‘arrefe olan bâ‘isetü’l-kitâb Zeliha bt. Mustafa nâm hatunun meclis-i şer‘-i şerîf-i enverde zevc-i sâbıkı müderrisîn-i kirâmdan es-Seyyid Ali Efendi b. es-Seyyid Mehmed mahzarında takrîr-i kelâm ve ta‘bîr-i ani’l-merâm edip mezbûrun firâşından hâsıl ve benden mütevellid ve bi-hakkı’l-hıdâne hâlâ hacr u terbiyemde olan işbu es-Seyyid Mehmed Reşid nâm sagīrin mâlı olmayıp ve nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve-bahâsı için babası merkūm üzerine kıbel-i şer‘den kadr-ı ma‘rûf meblağ farz ve takdîr olmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadrü’l-kitâb tûbâ lehû [ve] hüsnü-meâb efendi hazretleri dahi sagīr-i mezbûrun nafaka ve kisve-bahâsı için babası merkūm es-Seyyid Ali Efendi üzerine târih-i kitâbdan beher yevm beşer para farz ve takdîr buyurup meblağ-ı mefrûz-ı mezkûru sagīr-i mezkûr es-Seyyid Mehmed Reşid’in nafaka ve kisvesine harc u sarf ve lede’l-iktizâ istidâneye ve inde’z-zafer babası merkūm es-Seyyid Ali Efendi üzerine rücû‘a vâlidesi mezbûre Zeliha Hatun’a izin vermeğin mâ vaka‘a bi’t-taleb ketb olundu. Fi’l-yevmi’s-sâdis aşer min-şehri Rebî‘i’l-evvel li-sene hamse [ve] semânîn ve mie ve elf. Şuhûdü’l-hâl: Muhzır Hacı Ahmed Beşe, Muhzır Hacı İsmail b. Ali, Muhzır Ali Çelebi, Muhzır Musa v. İsmail, Uzun Hüseyin b. Süleyman. [94b-95b, boş sayfalar]