İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 299 Hüküm no: 265 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin’in babası Hasan Ağa’nın ortağı Hüseyin Ağa’ya olan borcunu yüz otuz bir gün içerisinde ödemeye söz verdiği Mahmiye-i İstanbul’da Atmeydânı kurbünde Sinan Ağa mahallesinde ahâlîsinden olup bundan akdem vefât eden Hasan Ağa b. Mustafa Ağa’nın sulbî sagīr oğlu Mehmed Emin’in vasîyy-i muhtârı olan Tahir Efendi b. Ahmed nâm kimesne meclis-i şer‘-i şerîf-i enverde bâ‘isü’l-kitâb Hüseyin Ağa b. Ahmed nâm kimesne mahzarında bi’l-vesâye ikrâr-ı tâm ve takrîr-i kelâm edip vasîsi olduğum Mehmed Emin’in babası müteveffâ-yı mezbûr Hasan Ağa işbu Hüseyin Ağa yedinde olan bin yüz seksen bir senesi târihiyle müverrah ve merhûm-ı mezbûr Hasan Ağa’nın imzâ ve hâtemiyle mahtûm bir kıt‘a temessük mantûkunca medîne-i [94a] Üsküdar kazâsına muzâfe Karamürsel nâhiyesinde vâki‘ Adilviran nâm karye ve tevâbi‘inde vâki‘ altı aded tımarlar müteveffâ-yı mezbûr Hasan Ağa ile merkūm Hüseyin Ağa’nın ale’l-iştirâk taht-ı iltizâmlarında olup tımar-ı mezkûrun a‘şâr-ı şer‘iyye ve sâirlerini re‘âyâdan ahz u kabz ve kendilere irsâle tarafından me’mûr olan gāib ani’l-meclis Ali Yazıcı b. Abdullah sene-i mezkûrda re‘âyâdan ahz eylediği a‘şâr-ı şer‘iyye ve rüsûmât-ı sâireden tahsîl ve cem‘ eylediği cem‘an bin dört yüz kırk beş guruş bundan akdem merkūm Ali Yazıcı yedinden ben bi’l-vesâye ahz u kabz edip merkūm Hüseyin Ağa’nın meblağ-ı mezkûrdan hissesine isâbet eden yedi yüz yirmi iki buçuk guruşun üç yüz on guruşunu kendiye bi’l-vesâye teslîm ol dahi yedimden ahz u kabz edip bâkī dört yüz on iki buçuk guruş hâlâ zimmetimde vâcibü’l-edâ deynim olmağla ve bâkī-i mezkûru târih-i kitâbdan yüz otuz bir gün tamamında kendiye tamamen edâ ve teslîme ta‘ahhüd eylediğinde ol dahi râzı oldu dedikde mezbûr Hüseyin Ağa dahi vasîyy-i mukırr-ı merkūm Tahir Efendi’yi cemî‘ kelimâtında [vi]câhen ve şifahen ba‘de’t-tasdîk vasîyy-i mezbûr Tahir Efendi i‘âde-i kelâm edip eğer vasîsi olduğum sagīr-i merkūm Mehmed Emin ba‘de’l-bulûğ meblağ-ı merkūmu mezbûr Hüseyin Ağa’dan taleb ve da‘vâ edip meblağ-ı merkūmdan küllen ve ba‘zen şer‘an bir nesne ahz eder ise me’hûzuna ben kefîl ve zâmin oldum dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 15 Rebî‘ülevvel sene [1]185. Şuhûdü’l-hâl: Muhzır Ali b. Abdullah, Mübâşir Ahmed Ağa b. Abdullah, Mehmed Efendi b. Eyüb, İsmail Efendi b. Abdullah, Mustafa b. Abdullah, Bostânî Ebûbekir b. Ömer, Mustafa [b.] Abdullah, Hâfız Mehmed Efendi b. Mehmed Efendi, Molla Musa b. İsmail, Muhzır Hüseyin b. Abdullah, Muhzır Ali b. Mehmed, Tahtacı Osman Ağa b. Hamza, Hüseyin b. Süleyman, Muhzır Mehmed ve gayruhum mine’l-huzzâr.