İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 52 Hüküm no: 7 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Halil b. İbrahim’in Kasımpaşa’daki ekmekçi fırını ve değirmenin nısfını Agop v. Kazer ile Abraham v. Totar’a iki bin dört yüz guruşa sattığı Mübâya‘a-i habbâz Habbâz tâifesinden el-Hâc Halil b. İbrahim nâm kimesne tarafından husûs-ı âti’l-beyânın [beyânda] ber-vech-i câ’î ikrâra vekîl olduğu es-Seyyid Mehmed Said Ağa b. es-Seyyid el-Hâc Mustafa ve es-Seyyid el-Hâc Ahmed b. Mehmed nâm kimesneler şehâdetleriyle şer‘an sâbit ve mütehakkık olan Fındıklı[lı] Mehmed Ağa b. el-Hâc İsmail nâm kimesne meclis-i şer‘-i şerîf-i enverde işbu bâ‘isü’r-rakīm Agop v. Kazer ve şerîki Abraham v. Totar nâm zimmîler muvâcehelerinde bi’l-vekâle ikrâr-ı tâm ve takrîr-i kelâm edip mahrûse-i Galata’ya muzâfe kasaba-i Kasımpaşa’da Debbağhâne Meydânı’nda vâki‘ bir bâb ekmekçi fırını ile yine Kasımpaşa’da Kulaksız Mahallesi’nde vâki‘ bir bâb ekmekçi fırınına merbût mârrü’z-zikr Debbağhâne Meydânı’nda vâki‘ altı horos değirmenin derûnlarında mevcûde erbâbı beyninde [fırın ve değirmenin] gedikleri ta‘bîr olunur yirmi dört re’s bargir ve bi’l-cümle âlât-ı lâzıme-i ma‘lûme müstakillen müvekkilim mezbûrun yedinde mülkü ve mâlı olmağla, müvekkilim mezbûr el-Hâc Halil sâlifü’z-zikr iki bâb ekmekçi fırınları ve değirmenleri gedikleri ta‘bîr olunur mârrü’z-zikr bargirler ve bi’l-cümle âlât-ı lâzıme-i sâire-i ma‘lûmesinin nısfını kendi yedinde ibkā edip ve nısf-ı âharına isâbet eden on iki bargir ile âlât-ı lâzıme-i sâiresini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūmân Agop ve Abraham zimmîlere bi’l-münâsafa ale’l-iştirâk iki bin dört yüz guruşa bey‘ ve temlîk ve teslîm eylediğinde, onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr iki bin dört yüz guruşu müvekkilim mezbûra def‘ ü teslîm eylediklerinde, ol dahi yedlerinden tamamen tesellüm ve ahz ü kabz edip mebî‘-i mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan her biri âharın zimmetini ibrâ-i âm ile ibrâ ve ıskāt ve her biri âharın ibrâsını kabûl eylediler. Ba‘de’l-yevm sâlifü’z-zikr iki bâb ekmekçi fırını ve değirmenin gedikleri ta‘bîr olunur bargir ve bi’l-cümle âlât-ı lâzıme-i sâire-i ma‘lûmesinin nısfları mersûmân Agop ve Abraham zimmîlerin bi’l-münâsafa ale’l-iştirâk mülk-i müşterâları ve hakk-ı sırfları olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 Rebî‘ülevvel sene 1193. Şuhûdü’l-hâl: Habbâzân Kethudâsı İsmail Ağa, Yiğitbaşı Ahmed Ağa, es-Seyyid el-Hâc Ahmed Ağa b. ( ), Hâfız Molla Mustafa.