İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 53 Hüküm no: 8 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Hüseyin ve kızı Ayşe’nin Balıkpazarı Kapısı dışındaki peynirci dükkânı gediğini Peynirci Musa Beşe b. Osman’a üç yüz guruşa sattıkları Mübâya‘a-i âlât-ı peynirci Mahmiye-i İstanbul’da Firuzağa Mahallesi’nde sâkineler olan Rukiye bt. Hüseyin b. Abdullah ve sadriye kızı Âişe bt. Hüseyin b. Mustafa nâm hatunlar taraflarından husûs-ı âti’l-beyânda ber-vech-i câ’î bey‘ ve kabz-ı semen ve ibrâya vekîlleri olduğu mezbûretânın zâtlarını bi’l-ma‘rifeti’ş-şer‘iyye ârifân Ebûbekir Ağa b. Mehmed ve es-Seyyid Ahmed Ağa b. Mustafa nâm kimesneler şehâdetleriyle şer‘an sâbit ve mütehakkık olan Ahmed Ağa b. Osman nâm kimesne meclis-i şer‘-i şerîf-i enverde işbu bâ‘isü’l-kitâb Peynirci Musa Beşe b. Ebûbekir nâm kimesne muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Balıkpazarı Kapısı hâricinde Helvâcı zukāğında vâki‘ bir bâb peynirci dükkânı derûnunda mevcûde peynirci esnâfına mahsûs beyne’l-hiref gedik ta‘bîr olunur dört kantar ve iki terâzi ma‘a derâhim ve yirmi fıçı [ve] on desti ve sekiz tabla ve bir peynir destgâhı ve iki bıçak ve bir seccâde ve bir çekmece ve âlât-ı sâire-i ma‘lûme sekiz sehm i‘tibâriyle bir sehmi merkūme Rukiye Hatun’un ve iki sehmi kızı mezbûre Âişe Hatun’un ale’l-iştirâk yedlerinde mülkleri olmağla, hâlâ ben müvekkilelerim mezbûretânın akd-i âtiyyü’z-zikrin sudûruna değin ber-minvâl-i muharrer yedlerinde mülkleri olan eşyâ-i muharrere-i mezkûreyi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz guruşa bi’l-vekâle mezbûr Musa Beşe’ye bey‘ ve teslîm eylediğimde, ol dahi ber-minvâl-i muharrer iştirâ ve tesellüm ve kabûl ve semeni olan meblağ-ı mezbûr üç yüz guruşu bana teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve bi’l-cümle husûs-ı mezkûra müte‘allika âmme-i da‘vâdan her birimiz bi’l-asâle ve bi’l-vekâle âharın zimmetini ibrâ-i âm ile ibrâ ve ıskāt ve her birimiz âharın ibrâsını kabûl eyledik. Ba‘de’l-yevm müvekkilelerim mezbûretânın asla ve kat‘â alâka ve medhalleri kalmayup eşyâ-i muharrere-i mezkûre merkūm Musa Beşe’nin emvâl-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Rebî‘ülevvel sene 1193. Şuhûdü’l-hâl: Pazarbaşı İbrahim, Hâfız Molla Mustafa, Bölükbaşı Halil Çelebi.