İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 76 Hüküm no: 34 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Mehmed Ağa b. Ahmed’in Beşiktaş Köyiçi’ndeki değirmeninin altı hissesini karısı Hatice bt. Mehmed’e dokuz yüz guruşa sattığı Mübâya‘a-i uncu Uncu tâifesinden Mehmed Ağa b. Ahmed nâm kimesne meclis-i şer‘-i hatîr-i lâzımü’t-tevkīrde hâlâ zevcesi olan bâ‘isetü hâzihi’l-vesîka Hadîce bt. Mehmed nâm hatun tarafından husûs-ı [âti]’l-beyânda ber-vech-i câ’î tasdîka vekîl-i şer‘îsi Fındıklılı Mehmed Ağa b. İsmail nâm kimesne mahzarında ikrâr-ı tâm ve takrîr-i kelâm edip mahrûse-i Galata’ya muzâfe Beşiktaş’da Köyiçi nâm mahâlde vâki‘ on altı sehim i‘tibâr olunan dört horoslu bir bâb değirmen derûnunda mevcûde beyne’l-hiref gedik ta‘bîr olunur on altı re’s bargirde akd-i âti’z-zikrin sudûruna değin yedimde mülküm olan altı re’s bargir ve altı re’s bargire isâbet eden âlât-ı lâzıme-i sâire-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile dokuz yüz guruşa zevcem müvekkile-i mezbûre Hadîce Hatun’a bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dokuz yüz guruşu bana def‘ ü teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan zevcem müvekkile-i mezbûre Hadice’nin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl fîmâ-ba‘d benim asla ve kat‘â alâka ve medhalim kalmayup sâlifü’z-zikr altı re’s bargir ve altı re’s bargire isâbet eden âlât-ı lâzıme-i ma‘lûme zevcem müvekkile-i mezbûre Hadîce Hatun’un mülk-i müşterâsı olmuşdur, keyfe mâ teşâ’ ve tahtâr mutasarrıfe olsun [9b] dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Ca sene [1]193. Şuhûdü’l-hâl: Uncular Kethudâsı vekîli es-Seyyid el-Hâc Ahmed, Hâfız Mustafa, Fındıklılı Mehmed Ağa, Uncular Yiğitbaşısı el-Hâc Abdi, Şa‘riyyeci Molla Mehmed.