İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 75 Hüküm no: 33 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar İbrahim b. Mehmed’in Mahmudpaşa Çarşısı’nda Şerbetci Dimitri v. Tegodoş’daki alacağına karşılık bin yüz guruşu aldığı ve dükkân eşyalarındaki rehini kaldırdığı Fekk-i rehn-i şerbetci Mahmudpaşa’da Mahmiye-i İstanbul’da Vâlide Câmi‘-i şerîfi kurbünde Mısır Çarşısı attarlarından el-Hâc İbrahim b. Mehmed nâm kimesnenin li-ebeveyn karındaşı ve tarafından husûs-ı âti’l-beyânda ber-vech-i câ’î ikrâra vekîl olduğu es-Seyyid Ali Ağa b. es-Seyyid Mustafa ve Şerbetci Hüseyin Ağa b. Receb nâm kimesneler şehâdetleriyle şer‘an sâbit ve mütehakkık olan el-Hâc Hüseyin nâm kimesne meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Şerbetci Dimitri v. Tegodoş nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim karındaşım merkūm el-Hâc İbrahim’in mersûm Şerbetci Dimitri zimmî zimmetinde semen-i mebî‘den ber-mûceb-i i‘lâm-ı şer‘î mahkûmun-bih hakkı olan üç bin iki yüz elli guruşun bi-tarîkı’s-sulh bin yüz guruşunu merkūm Şerbetci Dimitri zimmî müvekkilim mezbûr el-Hâc İbrahim’e def‘ ü teslîm eylediğinde, ol dahi yedinden tesellüm ve ahz ü kabz edip mâ‘adâ bâkī kalan iki bin yüz elli guruş mutâlebesine ve bi’l-cümle husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Şerbetci Dimitri zimmînin zimmetini ibrâ-i âm ile ibrâ ve ıskāt eylediğinde, ol dahi ibrâ-i mezkûru ba‘de’l-kabûl mersûm Şerbetci Dimitri zimmî meblağ-ı mezbûr mukābelesinde mahmiye-i merkūmede Mahmudpaşa Çarşısı kurbünde vâki‘ şerbetci dükkânı derûnunda mevcûde beyne’l-esnâf gedik ta‘bîr olunur rehin vaz‘ ve teslîm eylediği âlât-ı ma‘lûmesini müvekkilim mezbûr el-Hâc İbrahim hâlâ rehniyetden fek ve ihrâc ve mersûm Şerbetci Dimitri’ye teslîm eylediğinde, ol dahi yedinden tesellüm ve kabz eyledi. Ba‘de’l-yevm müvekkilim mezbûr el-Hâc İbrahim’in mesfûr Şerbetci Dimitri zimmî zimmetinde asla bir akçe ve bir habbe hakkı ve alacağı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 Ca sene 1193. Şuhûdü’l-hâl: Şerbetciler Kethudâsı el-Hâc İbrahim b. Mahmud, Şerbetci el-Hâc Ali b. Veli, Şerbetci Mahmud Ağa b. İsmail, Şerbetci el-Hâc Mehmed Emin b. el-Hâc Mustafa.