İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 77 Hüküm no: 36 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Papa Nikola ve kız kardeşi Evdöke’nin Mirahur Mahallesi’ndeki menzillerini Todori v. Duka’ya bin üç yüz guruşa sattıkları Mübâya‘a Zikri âtî husûsu mahâllinde ketb ü tahrîr içün savb-ı şerî‘at-i garrâdan bi’l-iltimâs irsâl olunan fahrü’l-müderrisîni’l-kirâm Necibzâde es-Seyyid Feyzullah Efendi mahmiye-i İstanbul’da Mahmudpaşa kurbünde Kaşıkcılar Hânı’nda Cevâhirci Hoce Arslan zimmînin odasına varup zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm ettikde, mahmiye-i mezbûre mahallâtından Mirâhur Mahallesi mütemekkinlerinden Yanaki ve li-ebeveyn kız karındaşı olup şahsı ta‘rîf-i şer‘î ile mu‘arrefe olan Evdöke Nasrâniye ibney Papa Nikola nâm kimesneler meclis-i ma‘kūd-ı mezbûrda işbu bâ‘isü’s-sifr Todori v. Duka nâm zimmî mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin ırsen ve müşâ‘an silk-i mülk-i sahîhimizde münselik ve havza-i tasarrufumuzda münharıt emlâkimizden olup mahalle-i mezbûrede vâki‘ bir tarafdan Panokla-oğlu Aci Yanaki zimmî menzili ve bir tarafdan Aci Sotori zimmî menzili [ve] tarafeyni tarîk-i âm ile mahdûd ulyâda bir bâb oda ve bir sofa ve dehliz ve vüstâda üç bâb oda ve bir sofa ve dehliz ve süflâda bir bâb oda ve bir bi’r-i mâ’ ve iki ahur ve bir kenîf ve zât-ı eşcâr bir mikdâr bağçeyi müştemil mülk ve müşâ‘ ve müşterek menzilimizi tarafeynden îcâb ve kabûlü hâvî ve şürût-ı müfside ve mübtıladan ârî ve gabn ve telci’eden berî bey‘-i bâtt-ı sahîh-i şer‘î ile müşteri-i mesfûr Todori v. Duka zimmîye yalnız bin üç yüz guruşa bey‘ ve temlîk ve teslîm eylediğimizde, ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı merkūm bin üç yüz guruşu müşteri-i mesfûr Todori zimmî yedinden bi’t-tamam ve’l-kemâl ahz ü kabz ve beynimizde bi-kadri’l-hısas iktisâm dahi eyledik. Fîmâ-ba‘d menzil-i mahdûd-ı mezkûrda bizim vechen mine’l-vücûh ve sebeben mine’l-esbâb alâka ve medhalimiz kalmayup müşteri-i mesfûr Todori zimmînin mülk-i müşterâsı ve hakk-ı sırfı olmuşdur, keyfe-me-yeşâ’ ve hasbe-mâ-yahtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ma‘an mürsel ümenâ’-i şer‘le meclis-i şer‘a gelüp her biri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 20 min-Ca sene [1]193. Şuhûdü’l-hâl: Fahrü’l-kuzâtü’l-kirâm Atâ Efendi, Kaşıkçı Mehmed Ağa, Kaşıkçı el-Hâc Mahmud, Kâğıdcı el-Hâc Mustafa, Süleyman Ağa tâbi‘-i Necibzâde, Hoce Paskal v. İstefan, Hoce Arslan v. İstefan, Manolaki v. Harito dâmad-ı Hoce Arslan, Aci Yorgi v. Nikola.