İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 78 Hüküm no: 37 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Salih’in Beşiktaş Köyiçi’ndeki değirmenin iki hissesini Eyüb Beşe b. Habib’e üç yüz guruşa sattığı Mübâya‘a Mahrûse-i Galata’ya muzâfe Beşiktaş’da Bostan Mahallesi’nde sâkine İsmihan bt. Salih nâm hatun tarafından husûs-ı âti’l-beyânda ber-vech-i câ’î bey‘ ve kabz-ı semen ve ibrâya vekîl olduğu zât-ı mezbûreyi bi’l-ma‘rifeti’ş-şer‘iyye ârifân Molla Ali b. el-Hâc Mustafa ve Mehmed b. el-Hâc İsmail nâm kimesneler şehâdetleriyle şer‘an sâbit ve mütehakkık olan Uncular Kethudâsı Mustafa Ağa b. Mehmed nâm kimesne meclis-i şer‘-i hatîr-i lâzımü’t-tevkīrde bâ‘is-i hâzihi’l-vesîka es-Seyyid Eyüb Beşe b. Habib nâm kimesne mahzarında ikrâr-ı tâm ve takrîr-i kelâm edip sâlifü’z-zikr Beşiktaş’da Köyiçi nâm mahâlde vâki‘ on altı sehim i‘tibâr olunan dört horoslu bir bâb değirmen derûnunda mevcûde beyne’l-hiref gedik ta‘bîr olunur on altı re’s bargirde müvekkilem mezbûrenin akd-i âtiyyü’z-zikrin sudûruna dek yedinde mülkü olan iki re’s bargir ve iki re’s bargire isâbet eden âlât-ı lâzıme-i sâire-i ma‘lûmesini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz guruşa mezbûr es-Seyyid Eyüb Beşe’ye bi’l-vekâle bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz guruşu bana def‘ ü teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûr es-Seyyid Eyüb Beşe’nin zimmetini bi’l-vekâle ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm müvekkilem mezbûrenin asla alâka ve medhali kalmayup sâlifü’z-zikr iki re’s bargir ve iki re’s bargire isâbet eden âlât-ı lâzıme-i ma‘lûme mezbûr es-Seyyid Eyüb Beşe’nin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Ca sene [1]193. Şuhûdü’l-hâl: Uncular Kethudâsı vekîli es-Seyyid el-Hâc Ahmed, Hâfız Mustafa b. ( ), Fındıklılı Mehmed Ağa, Uncular Yiğitbaşısı Hacı Abdi, Şa‘riyyeci Kirmânî Molla Mehmed.