İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 91 Hüküm no: 51 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hüseyin’in Biga’daki tımarını vekâleten zabteden ve alacaklısı olduğu Ebubekir Ağa b. Ahmed ile yüz yirmi guruş karşılığında ibralaştıkları Sulh Mahmiye-i İstanbul’da Sultân Ahmed Câmi‘-i şerîfi kurbünde Türbe zukāğında sâkin es-Seyyid Mustafa b. Hüseyin nâm kimesne meclis-i şer‘-i enverde bâ‘is-i hâzihi’l-vesîka es-Seyyid Ebûbekir Ağa b. es-Seyyid Ahmed nâm kimesne tarafından husûs-ı âti’l-beyânda ber-vech-i câ’î sulh ve ibrâya vekîl olduğu es-Seyyid Osman Ağa b. Mehmed ve Ahmed b. Ali nâm kimesneler şehâdetleriyle şer‘an sâbit ve mütehakkık olan umdetü’l-müderrisîni’l-kirâm sa‘âdetlü Şekerzâde es-Seyyid Feyzullah Efendi b. es-Seyyid Mehmed Efendi mahzarında ikrâr-ı tâm ve takrîr-i kelâm edip bundan akdem Biga sancağında vâki‘ Güvercinlik’de Ceyyit nâm karye ve gayrıdan bâ-berât-ı âlî-şân mutasarrıf olduğum tımarımı müvekkil-i mezbûr es-Seyyid Ebûbekir Ağa izin ve tevkîlim ile altı sene zabt ve sinîn-i mezkûrede hâsıl a‘şâr-ı şer‘iyyesi semenlerinden makbûzu olan dört yüz kırk guruş ile bi’d-defa‘ât yedimden istikrâz ve kabz eylediği yedi yüz seksen yedi guruş ve müddet-i ma‘lûmede kendüye eylediğim hizmetimin ecr-i misli olan beş yüz guruş ki, müvekkil-i mezbûrun zimmetinde cem‘an bin yedi yüz yirmi yedi guruş hakkım olup meblağ-ı mecmû‘-ı mezkûru bundan akdem müvekkil-i merkūm es-Seyyid Ebûbekir Ağa’dan taleb ve da‘vâ eylediğimde, beynimizde münâza‘ât-ı kesîre ve muhâsemât-ı şedîde cereyân etmişidi. El-hâletü-hâzihî beynimize muslihûn tavassut edip da‘vâ-yı mezkûremden beni vekîl-i mûmâ-ileyh es-Seyyid Feyzullah Efendi ile yüz yirmi guruş üzerine ber-nehc-i şer‘î sulh eylediklerinde, ben-dahi ber-vech-i muharrer sulh-i mezkûru kabûl ve bedel-i sulh olan meblağ-ı mezbûr yüz yirmi guruşu vekîl-i mûmâ-ileyh es-Seyyid Feyzullah Efendi işbu meclis-i şer‘de bana def‘ ü teslîm eylediğinde, ben dahi yedinden tamamen tesellüm ve ahz ü kabz edip mâ‘adâsı olan bin altı yüz yedi guruş mutâlebesine ve bi’l-cümle husûs-ı mezkûra ve hukūk-ı sâireye müte‘allika târih-i vesîkaya gelince ma‘lûmen ve mechûlen âmme-i de‘âvî ve mutâlebât ve kâffe-i eymân ve muhâsamâtdan ben müvekkil-i mezbûr es-Seyyid Ebûbekir Ağa’nın zimmetini ibrâ-i âmm-ı kātı‘ü’n-nizâ‘ ile ibrâ ve ıskāt eylediğimde, mûmâ-ileyh es-Seyyid Feyzullah Efendi dahi bedel-i sulh olmak üzere bana medfû‘u olan meblağ-ı mezbûr yüz yirmi guruşa müte‘allika âmme-i da‘vâdan bi’l-vekâle benim zimmetimi ibrâ-i <> âm ile ibrâ ve ıskāt edip ve her birimiz âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Şa‘bân sene [1]193. Şuhûdü’l-hâl: Mahtûmîzâde Abdurrahman Efendi, Mustafa b. Mehmed, Molla Ali b. Mehmed, Ali Efendi b. Hüseyin, Ahmed b. Ömer.