İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 90 Hüküm no: 50 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Receb Beşe’nin Kumkapı’daki ekmekçi fırınındaki eşyaların Zakar v. Ohan ve ortakları Avanes ile Kirkor’a ait olduğunu tasdik ettiği Mübâya‘a Mahmiye-i İstanbul’da Emîn Bey Mahallesi’nde sâkin habbâz tâifesinden Receb Beşe b. ( ) nâm kimesne meclis-i şer‘-i hatîr-i lâzımü’t-tevkīrde yine tâife-i merkūmeden hâmil-i hâze’l-vesîka Zakar v. Ohan ve şerîki Avanes v. ( ) nâm zimmîler muvâcehe <> lerinde ikrâr-ı tâm ve takrîr-i kelâm edip mahmiye-i merkūmede Kumkapı dâhilinde Nişancı Paşa Câmi‘-i şerîfi civârında Kolluk karşusunda vâki‘ bir bâb ekmekçi fırını derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûme bundan akdem vefât eden hasren vârisi olduğum babam Mustafa’nın hayatında ile’l-vefât yedinde mülkü ba‘de vefâtihî müstakillen bana mevrûs oldukdan sonra fırın-ı mezkûr icâresinden gāib ani’l-meclis Ali Efendi’ye zimmetimde deynim olan üç yüz yirmi guruş mukābelesinde âlât-ı mezkûreyi ben mezbûr Ali Efendi’ye bey‘ ve teslîm, ol dahi yedimden ba‘de’l-iştirâ ve’l-kabz [ve] bin yüz seksen üç senesi târihinde mersûmân Zakar ve Avanes ile âhar şerîkleri gāib ani’l-beled Kirkor nâm zimmîye semen-i ma‘lûm ve makbûza ale’l-iştirâki’s-seviy bey‘ ve temlîk ve teslîm, onlar dahi yedinden iştirâ ve temellük ve tesellüm ve kabûl etmeleriyle, âlât-ı mezkûre târih-i merkūmdan berü mersûmûn Zakar ve Avanes ve Kirkor zimmîlerin seviyen mülk-i müşterâları olup benim asla ve kat‘â alâka ve medhalim kalmamışdır dedikde mersûmân Zakar ve Avanes dahi mezbûr Receb Beşe’yi kelimât-ı meşrûhasında vicâhen ve şifâhen tasdîk ve tahkīk etmeğin mâ-hüve’l-vâki‘ bi’t-taleb ketb olundu. Hurrire fî 19 min-Receb [li-]sene [1]193. Şuhûdü’l-hâl: Kethudâ İsmail Ağa, Yiğitbaşı Ahmed Bedir-zâde, Sayıcı Osman, es-Seyyid Mehmed Said Ağa, Küçük Receb Beşe.