İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 93 Hüküm no: 53 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Mardiros v. Artin’in Sütlüce’deki ekmekçi fırını ve değirmenin altı hissesini Agop v. Bedros’a iki bin yedi yüz guruşa sattığı Mübâya‘a Habbâz tâifesinden Mardiros v. Artin nâm zimmî meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Agop v. Bedros nâm zimmî muvâcehesinde ikrâr-ı tâm ve takrîr-i kelâm edip Havâss-ı refî‘a kazâsına muzâfe Südlice karyesinde vâki‘ bir bâb ekmekçi fırını ve ona merbût ittisâlinde [kâin] altı horoslu bir bâb değirmen derûnunda mevcûde beyne’l-hiref gedik ta‘bîr olunur yirmi dört re’s bargirin akd-i âti’z-zikrin sudûruna dek yedimde mülküm olan on sekiz re’sinden her bir re’si dörder yüz ellişer guruşa olmak üzere [altı re’s bargir ile] altı re’s bargire isâbet eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile iki bin yedi yüz guruşa mersûm Agop zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı merkūm iki bin yedi yüz guruşu bana def‘ ü teslîm eylediğinde, ben dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Agop zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm mârrü’z-zikr altı re’s bargire isâbet eden âlât-ı lâzıme-i ma‘lûmede benim alâkam kalmayup müşteri-i mersûm Agop zimmînin mülk-i müşterâsı olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 29 Recebi’l-ferd sene [1]193. Şuhûdü’l-hâl: Kethudâ İsmail Ağa, Yiğitbaşı Ahmed, es-Seyyid Mehmed Said. eş-Şâhidûne’s-sâbıkūn.