İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 94 Hüküm no: 54 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul turşucular esnafının kethudalığına Ali Usta b. Hüseyin’in tayin edildiği Kethudâ-i turşucu Âsitâne-i aliyye’de vâki‘ turşucular esnâfının ihtiyârlarından yiğitbaşı Osman Usta ve el-Hâc Hasan ve Ali Usta ve Abdülkadir Usta ve el-Hâc Mustafa ve Mehmed Usta ve Ahmed Usta ve Süleyman Usta ve İbrahim Usta ve Mustafa Usta ve Osman Usta ve sâirleri meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip kethudâmız olan işbu hazır bi’l-meclis İbrahim Usta b. Musa umûr ve mesâlihimizi rü’yetde tekâsül ve aczi olduğundan kethudâlıkdan bi’l-külliye keff-i yed etmekle, işbu bâ‘isü’l-kitâb Kıztaşı nâm mahâlde sâkin Ali Usta b. Hüseyin nâm kimesne esnâfımızın kudemâsından örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık umûrunu rü’yete kādir ve cümlemizin muhtârı olmağla, kıbel-i şer‘den merkūm Ali Usta üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i [15b] sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri dahi merkūm İbrahim Usta’nın yerine merkūm Ali Usta’yı kethudâ nasb ve ta‘yîn ve umûrlarını ber-mu‘tâd-ı kadîm rü’yet ve hilâf-ı şer‘-i mutahhar bir ferde rencîde etmemek üzere tenbîh buyurduklarında, ol dahi kabûl ve hidemât-ı lâzımesini kemâ-yenbagī ikāmete ta‘ahhüd etmeğin mâ-vaka‘a bi’t-taleb ketb olundu. Fî 4 Şa‘bâni’l-mu‘azzam sene [1]193. Şuhûdü’l-hâl: İsmail Çelebi, İbrahim Usta, el-Hâc Hasan, el-Hâc Mehmed, diğer el-Hâc Hasan.