İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 115 Hüküm no: 78 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Ağa b. Ahmed’in alacaklısı olduğu Ayşe bt. İbrahim ile bin yüz guruş karşılığında zimmetini ibra ettiği Mahmiye-i İstanbul’da Muradpaşa Mahallesi’nde sâkin zümre-i mültezimînden el-Hâc Yakub Ağa b. Ahmed nâm kimesne meclis-i şer‘-i hatîr-i lâzımü’t-tevkīrde zâtı zeyl-i kitâbda mektûbü’l-esâmî Müslimîn ta‘rîfleriyle mu‘arrefe olan bâ‘isetü hâze’l-vesîka Âişe bt. İbrahim nâm hatun mahzarında ikrâr-ı tâm ve takrîr-i kelâm edip bundan akdem mezbûre Âişe Hatun ile sadrî kebîr oğlu müteveffâ Mehmed Emin Efendi b. Süleyman hayatında kendi yedimle mâlımdan bir def‘a yedi yüz yetmiş guruş ve hazır bi’l-meclis Sarrâf Bedros v. Aleksan nâm zimmî yediyle bir def‘a dahi iki bin dört yüz yirmi guruş ki ale’l-iştirâki’s-seviy cem‘an üç bin yüz doksan guruş ikrâz ve teslîm, onlar dahi ber-vech-i muharrer istikrâz ve tesellüm ve ahz ü kabz ve her biri âharın zimmetine lâzım gelen meblağın bi’l-emr ve’l-kabûl bana edâsına kefâlet-i sahîha-i şer‘iyye ile kefîl ve dâmin olmalarıyla, meblağ-ı mecmû‘-ı mezkûr üç bin yüz doksan guruşu asâlet ve kefâlet-i mezkûresine binâen merkūme Âişe Hatun’ndan taleb ve da‘vâ eylediğimde, beynimizde münâza‘ât-ı kesîre ve muhâsemât-ı şedîde cereyân etmişidi. El-hâletü-hâzihî beynimize muslihûn tavassut edip da‘vâ-yı mezkûremden beni mezbûre Âişe Hatun ile bin yüz guruş üzerine ber-nehc-i şer‘î sulh eylediklerinde, ben dahi ber-minvâl-i muharrer sulh-i mezkûru ba‘de’l-kabûl bedel-i sulh-i merkūm bin yüz guruşu merkūme Âişe Hatun’un yedinden tamamen ahz ve kabz edip mâ‘adâsı olan iki bin doksan guruş mutâlebesine ve bi’l-cümle husûs-ı mezkûra müte‘allika işbu târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan mezbûre Âişe Hatun’un zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm merkūme Âişe Hatun ile husûs-ı mezbûra müte‘allika asla ve kat‘â vechen mine’l-vücûh da‘vâ ve nizâ‘ım ve yed ve zimmetinde bir akçe ve bir habbe hakkım ve alacağım kalmamışdır dedikde gıbbe’t-tasdîkı’ş-şer‘î hâzır-ı mersûm Sarrâf Bedros zimmî meclis-i şer‘-i münîrde merkūme Âişe Hatun mahzarında ikrâr-ı tâm ve takrîr-i kelâm edip mezbûr el-Hâc Yakub Ağa’nın ber-minvâl-i meşrûh benim yedimle mezbûrân Âişe Hatun ve Mehmed Emin Efendi’ye iktirâz eylediği meblağ-ı mezbûr iki bin dört yüz yirmi guruş mezbûr el-Hâc Yakub Ağa’nın kendi mâlı olup kat‘â benim alâkam olmamağla, husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsamâtdan ben-dahi merkūme Âişe Hatun’un zimmetini ibrâ-i âm ile ibrâ ve ıskāt eyledim dedikde mezbûre Âişe Hatun dahi mersûm Bedros zimmîyi kelimât-ı meşrûhasında tasdîk ve tahkīk ve ibrâ-i mezkûru kabûl etmeğin mâ-vaka‘a bi’t-taleb ketb olundu. Fî 20 min-Zilka‘de sene [1]193. Şuhûdü’l-hâl: el-Hâc Ahmed Efendi b. el-Hâc Hüseyin, Kasım Ağa b. Mehmed, Abdurrahman Efendi Müezzin-i Câmi‘-i Kâtib Sinan, Yusuf Efendi b. Abdullah, Ömer Ağa b. Osman.